Su Casteddu si pigat unu puntu in Empoli, aunia paregiat po 0-0 e s’acostiat unu pagheddu de prus a si sarvai. “Seus crescius po cantu pertocat candu non teneus sa bocia: mai, in custu campionau, fustis arrennescius a acabbai duas partidas, una in fatu de s’atra, chena pigai gol”, narat Davidi Nicola candu s’amostat a is giornalistas in s’aposentu intregau. “Custas partidas prus de una borta non funt bellas de castiai, ma fait totu parti de su caminu chi seus fendu. Creu chi sa scuadra apat arrespustu beni, dapoi sa pensada po su benidori est cussa de fairi sempiri meglius. Immoi no est facili ca po giogai beni a fubalu abbisongiat a essiri in dus, chi non connoscis beni s’Empoli innoi podis perdiri”, aciungit s’allenadori de su Casteddu.
Cun s’Empoli, in sa partida giogada in Casteddu, is piciocus de Nicola iant perdiu po 0-2 e funt andaus in Asseminello po totu sa cida. Custa bia Nicola at cicau de si pigai su puntu chi ddi serbit massimamenti po poderai a sa matessi distantzia sa scuadra toscana. Chi est a nai, immoi iat essi sa de tres a ci calai in serie B.
Cussa de Empoli podiat essiri una partida decisiva, prus che a totu chi su Casteddu depessit binta, invecias totu abarrat comente de a innantis, ma cun dd’una partida de mancu de giogai. Intru de custa giornada, de is scuadras chi tenint interessu in sa parti bascia de classifica, totus, foras de su Monza, ant fatu puntus. Su Como de Fabregas sabudu si nd’at pigau tres in Monza; su Parma fians chi fut perdendu po 0-2 cun s’Inter ce dd’at fata a torrai a ponni in peis sa partida e s’at pigau unu puntu; su matessi at fatu su Verona chi est andau a paregiai in Torinu contras de sa scuadra allenada de Paulu Vanoli. E finas su Lecce cun su Venetzia s’ant cumpartziu unu puntu po unu, a pustis chi sa scuadra de Di Francesco fut bincendu po 0-1.
Màuru Mura
Lunis, su seti de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=SSCcxD9FKeI
