In s’aereportu de Su Masu, intregau a Mariu Mameli, est facili chi s’amostint passus lestrus, valigias chi lompint e valigias chi partint. E, aici e totu, est facili chi s’amostint imbrassus de chini lompit e de chini partit. In custas dis s’amostant finas Jhaneth, Aurelio e Olghita: tres personis chi s’agatant intru de is poltroncinas asulas. Ma nemus, sonumancu cussus chi andant coidendu bia domu o a pigai s’aparechiu, si nd’acatat. De cuasi una cida. Epuru, issus funt inigui chena dinari, chena orroba de papai, chena unu logu aunia andai. “Nemus nos at pediu nudda. Seus brava genti, boleus feti unu trabbagliu e una domu”, narat Jhaneth Rojas Sandoval, corantases annus, chi lompit de su Perù. Erribada in Sardigna in su mesi de Sant’Andria de su 2023, at trabbagliau comenti de badanti in Tzeddiani, aunia una familia dd’at agiudada po is paperis chi serbint. Ma, candu sa femina chi castiaiat est morta su trabbagliu de Jhaneth est acabbau. De tandu at cumentzau a andai de una parti a un’atra in cica de trabbagliu nou. Chi at agatau in Aristanis, ma finas innoi “candu sa femina chi castiaia est morta deu apu perdiu su trabbagliu”. Aici s’est agatada cheba de nudda in su coru de s’areoportu casteddaiu, paris a sa mama Olghita e su pobiddu Aureliu Panduro.
“Totu est mudau de una dì a un’atra”, contat sa picioca. Sa bogi s’abbasciat candu chistionat de is paperis chi funt acanta de non balliri prus: iat depiri lompiri finas a Nugoro po ddus torrai a fairi. “Ma non tengiu dinari po su trenu, aici comenti non ddu tengiu po papai”.
Aureliu, su pobiddu, intru de calencuna dì at a torrai in Perù: “Non tenit su dinari po lompiri finas a domu, non depiat andai aici, deu non sciu mancu chi possu pigai su dinari de s’asseguratzioni”.
Issa e sa mamma, invecias, ant abarrai in Sardigna. “Seus trabbagliadoras, genti seria. Boleus feti una possibilidadi”, narat cun sa dignidadi de chini non bolit arregalus, ma feti s’oportunidadi de si godangiai su papai.
Màuru Mura
Mercuris, su doxi de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.poltronafrau.com/ch/it/products/airports-aviation-projects.53433.html
