Est a nai ca su Casteddu c’at provau, ma a s’acabbu est sa Latzio de Baroni a si pigai is tres puntus. Po Davidi Nicola, a dogna manera, s’agatat meda de sarvai: “Deu soi cuntentu de comenti ant giogau is piciocus, depu nai sa beridadi”, is fueddus de s’allenadori de su Casteddu. “A dolumannu eus faddiu calencuna cosa e depeus donai prus crobba po custu. In su gol de dus eus faddiu de averas, ma sa scuadra at giogau e s’est acostiada a su gol. Soi cuntentu po Piccoli ca at fatu gol: candu feus gol soi sempiri allirgu, dapoi custu merì eus pagau tropu, ca non biaus s’ora de torrai a ponni sa partida in beni”.
Nicola si castiat a cussu chi at a lompiri dominigu a is tres de pusti prangiu: “Passaus a sa benienti, però custìanimu est de importu”, narat ancora pensendu a su Parma. “Nosi seus agataus indenanti una scuadra forti meda, podeus fairi sempiri meglius ma tocat a nai ca sa diferentzia intru de nosu e de sa Latzio est meda e chi non s’est bida e poita eus giogau beni”.
Sa partida est pragia a Nicola: “In sa parti de unu nosi seus abasciaus e eus donau tropu sa parti de mesu cun Viola, chi prus de una bia, at fatu su giogadori de mesu campu. Ma contras de scuadras comenti de sa Latzio podiat sussediri. Po duas o tres bortas eus faddiu ca boliaus fairi is cosas coidendu. Depeus cumprendiri ca is partidas andant ligias: eus a imparai a ddu fairi sempiri meglius, ma po mimi sa partida dda eus giogada beni”.
A innantis de una pariga de oras de su cumentzu de sa partida est lompia sa compora de Florinel Coman: “Teneus una manera de giogai chi connosceus: chi mi donant unu giogadori chi connosciu, ce dda facu a nai cussu chi tengiu in conca, chi nde chi nou cicu de fueddai e cumprendiri. Soi curiosu: Coman est un’ala chi giogat a manca e tenit calidadi. Bieus unu pagu comenti s’amostat e de seguru at a tenni abbisongiu de cumprendiri aunia s’agatat, finas chi su tempus no est meda”.
Màuru Mura
Martis, su cuatru de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=L57GQil8Zq0
