Su Rei Carrulu de Tres e sa reina Camilla ant a lompiri, in bisita in Italia, in su mesi de arbili benienti. At essi sa bia de cuatru chi Carrulu at a viagiai foras de s’Inghilterra a pustis de sa maladia chi dd’est picigada. Est a nai finas chi po sa borta de unu at a erribai in Italia comenti de Rei, a pustis chi, in su tempus passau, est lompiu comenti de Principi de su Galles, paricias bortas.
De cussu chi faint connosciri de Buckingham Palace, Carrulu e Camilla, ant atobiai su paba Franciscu, po su Giubileu, in su Vaticanu. Ma s’ant a frimai in Roma puru e dapoi ant a sighiri po lompiri in Ravenna.
“Su Rei e sa Reina ant a lompiri a bisitai su Stadu de su Vaticanu e de sa Republica italiana in su cumentzu de arbili de ocannu”, si ligit in su paperi. In segus, sempiri Buckingham Palace, precisat ca, is matessis Carrulu e Camilla, ant essi erricius de “sa Santidadi de Paba Franciscu po sa celebratzioni de su Giubileu”.
Po cantu pertocat su caminu de is realis in Italia, su paperi, po immoi, narat de “impignus in Roma e Ravenna”, ponendu in is pumus artus sa volontadi de “arregodai sa relata forti, de una parti e de s’atra, intru de s’Italia e su Regnu Uniu”. Totu s’atru, acabbat de nai Buckingham Palace, at essi fatu connosciri in segus.
A un’ala de su paperi, benit arregodau comenti su Rei Carrulu de Tres, chi at lompiu is setantases annus de idadi, siat giai lompiu, comenti de Principi de su Galles, giai cincu bias in su Vaticanu: sa borta de unu in su 1985, sa borta de dus po s’interru de Giuanni Paulu de Dus, atras duas bortas paris a Camilla etotu e s’urtima bia, in su 2019, candu ant fatu s’ingresu Newman cardinali.
Sempiri su paperi de su Palatzu Reali arremonat finas ca Carrulu in Italia est lompiu po sa bia de unu in su 1984 e s’urtima in su 2021 po su G20 po ddue pigai parti.
Màuru Mura
Cenarba, su seti de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.repubblica.it/moda-e-beauty/2024/04/09/news/carlo_iii_camilla_matrimonio_royal_family_diana_storia_amore-422440628/
