Un’arbitru de dixiot’annus scutu mali de unu babbu a s’acabbu de s’urtima partida de una filera de fubalu po pipius a suta de is dos’annus de idadi. Est sussediu in su “memorial” po arregodai a Mirku Poggioni chi at ghiau in vida is giovunus de sa scuadra de s’Aretzu. Totu est sussediu a intru de is spogliatoius: s’arbitru, de sa setzioni de Aretzu e totu, at obertu sa janna pensendu ca ddi depiant donai is distintas de is scuadras a s’acabbu de sa partida, ma s’est agatau indenanti un’omini de corantacinc’annus chi bivit in Pesaro, ma de arreiginis campanas, babbu de unu giogadori de sa Vis Pesaro. S’omini est imbucau in s’aposentu de s’arbitru e, a pustis airi serrau beni sa janna, at cumentzau a scudiri su piciocu cun punnigosus, a corpus de cadira e mossiendudeddu. Po s’arbitru, chi dapoi est andau in su spidali, ant a serbiri coranta dis po sanai: duas costas segadas, una pala chi si depit ripigliai, lidigoris e scarrafius. Totu iat essi filmau de is telecameras.
Is corpus iant essi lompius a pustis chi s’arbitru at cumandau unu rigori a sa scuadra de domu chi, po is atrus, non ddue fut. S’omini, torrendu gratzias a is matessis telecameras e a is dirigentis de s’Aretzu chi ddu ant connotu, in segus est stetiu frimau de is carabineris e immoi si depit difendiri po is curpas de airi scutu su piciocu. Ma, non feti, poita at a depiri arrespundiri de sa curpa de secuestru de personi. “Cosas de macus – at nau Pàulu Bertini, diretori de is scuadras de is giovunus de s’Aretzu – no est possibili chi una di de festa po pipius de dox’annus si mudit in violentzia aici manna”.
Solidariedadi a s’arbitru Larentu Petrelli est lompia de su presidenti aretinu Guglielmu Manzo e de su diretori sportivu Nello Cutolo, in su mentris chi sa Vis Pesaro at suspendiu su babbu po biri is partidas. S’arbitru, dapoi de is curas in su spidali San Donato est torrau a domu sua e immoi at a podiri pensai feti a s’esami de cuita liceu.
Màuru Mura
Lunis, su dexi de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.torinotoday.it/cronaca/Arbitro-aggredito-squalifiche-calciatori-Roletto-Villar-Perosa.html
