Cuarta partida perdia de sighiu po su Casteddu, intru de Serie A e Coppa Italia. Ma Davidi Nicola non s’amostat disisisperau: “Depu nai ca eus fatu una partida bona, a parti unu cuartu de ora intru de s’acabbu de sa parti de unu e su cumentzu de sa parti de dus”, custus funt is primus fueddus de s’allenadori de su Casteddu, in s’aposentu de is giorronalistas, a pustis sa partida perdia po 2-1 cun su Venetzia de Di Francesco. “Su Venetzia ci fut arrennesciu a essiri prus lestru e prus abistu de nosu in su gol de unu. Seus stetius in crobba e iaus faddiu pagu, ma cussu pagu dhi faddeus ddu pagaus inderetura: ddu depeus cumprendiri cun sa serenidadi de chini scit ca tocat a migliorai”.
In su gol de dus de su Venetzia sbaglius medas: “Si podit fairi sempiri calencuna cosa de prus, comenti finas, in segus a su 2-1, tenis cuatru possibilidadis mannas de fairi gol”, sighit Nicola. “Candu lompis de tres partidas, po mimi giogadas beni meda, biri totu nieddu non est giustu. Sa calidadi cun sa cali giogaus a bortas est bona, ma mancat sempiri s’acabbu de is atzionis. Sigheus a trabbagliai, creu feti in custu”
Nicola andat contras chini criticat custu tempus de su Casteddu: “Teneus un’identidadi crara, aunia mudat sa partida de is giogadoris cun certas giogadas. Atras bortas eus postu Lapadula paris a Piccoli, atras bortas unu giogadori de mesu campu prus a innantis: ma nosu, a parti cussu cuartu de ora, fustis postus beni in campu. Craru ca una parti de unu aunia ses a suta ti fait feli, ma depis essiri bravu a ponni sa bocia in palas de su portieri candu ndi tenis sa possibilidadi. Non soi abituau a biri totu nieddu: custu est su caminu chi depeus fairi”. Ma non abbisongiat de pensai immoi a comporas noas: “A ndi chistionai immoi non ddu agatu giustu. Tengiu custus giogadoris e funt dus de mancu cunfroma a ocannu passau poita ci furint Oristanio e Shomudorov. MA soi cuntentu de is giogadoris chi tengiu a disponimentu”.
Immoi po su Casteddu de Nicola lompint tres partidas cun scuadras lombardas: Inter in domu e Monza cun Milan foras. “Su Venetzia oi s’at pigau is puntus chi minesciat in atras partidas. Sa spera est chi sussedat finas a nosu su matessi”.
Màuru Mura
Lunis, su bintitres de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=3c2HueQlxos
