Su rei Carrulu de tresat postu in is pumus artus is dotoris chi ant agiudau e cunfortau sa familia reali, intru de sa chistionada de Paschigedda, a s’acabbu de un’annu sinnau de su cancuru de issu e totu e de sa nura Kate. Su rei, chi tenit setantases annus, at chistionau in dd’unu filmau, giai registrau a innantis in dd’una capella becia de unu spidali de Londra.
“Torru gratzias a is dotoris e a is infermieris chi, ocannu, ant agiudau mei e is atrus de sa familia, poita nos ant donau fortzas, curas e su cunfortu de su cali teniaus abbisongiu”, at nau rei Carrulu de Tres. “Soi finas cuntentu meda, e ddi torru gratzias, a totu cussus chi nos ant fatu lompiri fueddus de agiudu e de coragiu”.
Sa familia de is Windsor at biviu un’annu dificili meda in su 2024, cun sa nova mala de su cancuru de su rei in friargiu e, in martzu, cussu de sa prinicpessa de su Galles. Sa maladia, a dogna manera, ddus at postus a un’ala in sa vida publica. Su principi William, figliu mannu de Carrulu e podiddu de Kate, iat giai nau ca ocannu est stetiu s’annu prus dificili de sa vida sua. Carrulu, divenniu rei in su 2022 cun sa morti de sa mama, sa reina Elisabeta de dus, at torrau a s’amostai a s’acabbu de su mesi de arbili et est galu suta is curas de is dotoris. Sa principessa Kate at acabbau, invecias, is curas is su mesi de cabidanni e at torrau a s’amostai in foras a bellu a bellu.
In su fratempus, calencuna ora a innantis de su messagiu, su rei e sa reina Camilla ant pigau parti a sa missa de Paschigedda in Sandringham, acumpangiaus de William e Kate e atrus de sa familia. Intru de custus non si ddue agataiat su principi Andria, ma giai si sciat poita sa cida passada ddu iat nau. Sa familia funt stetius saludaus de genti meda in su mentris chi andaiant bia sa cresa de St Mary Magdalene in Norfolk.
Màuru Mura
Martis, su binticuatru de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://scenarieconomici.it/il-principe-carlo-dinghilterra-ha-il-coronavirus/
