“Fait spantu a biri Ilaria Salis setzia in su Paralmentu Europeu. Ma est una chistioni italiana e chi bosi pragit a mandai in Europa genti aici funt contus de bosatrus etotu”.
Custus is fueddus chi su presidenti ungheresu Viktor Orbas at nau, po cantu pertocat sa chistioni in pissu de Ilaria Salis, sa maistedda acapiada in Budapest e impresonada in sa matessi citadi po mesis meda chena peruna garantzia e sunfrendu meda.
Is fueddus chi at umperau su presidenti ungheresu ddus at naus in su paris de su Workshop Thea de Cernobbio, arrespundendu a is preguntas de is giornalistas.
“Chi dda castiaus de sa mirada de Budapest – at aciuntu su presidenti Viktor Orban – est prus che spantosu: lompiri in Ungheria in manera organizada e fairi violentzia contras de genti chi fut passillendu in su caminu e a pustis erribai in is bancus de su parlamentu europeu in Bruxelles est in su stili italianu, de certu non in cussu ungheresu”.
E ancora chistionat e narat ca cussu chi at fatu sa maista italiana de trintanoi annus, abarrada po prus de un’annu in presoni e portada in tribunali cun is cadenas finas in is burtzus de is peis e incurpada de airi scutu dus militantis de sa destra prus estrema, “est unu crimini mannu, finas chi immoi nosu non podeus fairi prus nudda poita su Parlamentu europeu dd’at a donai s’imunidadi e non ce dda eus a fairi a dda processai comenti iat essi giustu”.
S’arrespusta de Ilaria Salis, torrada in libertadi a pustis sa torrada eletorali de is europeas intru de sa Manca Italiana, non s’est fata aspetai: “A mimi miga mi spantat chi Orban agatit chi non siat giustu chi migliaias de italianus si siant postus de tressu a sa vendita sua fendumì lompiri in su Parlamentu Europeu. Po issu e po is amighigeddus fascistas in Ungheria e in s’orrestu de su mundu sa democratzia est calencuna cosa chi non si podit intendiri”, at scritu in is social.
Màuru Mura
Lunis, su noi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.adnkronos.com/internazionale/esteri/orban-contro-ilaria-salis-cosa-ha-detto_7kkC4PWBTIleIss9xfT86D
