A pustis sa prima torrada Marine Le Pen e Jordan Bardella funt giai contendu is segius chi mancaiant po si pigai sa magiorantzia e funt fueddendu de politiga estera, interna e de imigratizoni. Invecias, a spantu mannu, funt abarraus chena de nudda e finas Macron nde ddus at giumpaus.
In custa torrada bincit sa manca e su leader de France Insoumise, Jean Luc Melenchon, est giai prontu a guvernai. Comenti eus nau finas su centru de Macron non crollat e antzis giumpat su Rassemblement Natzionali in numurus. Finas is Republicanus faint meglius de cussu chi s’aspetaiat e duncas est feti una cussa chi at perdiu: Marine Le Pen.
Su spantu po custus numurus est de parti de totus. Su Fronti Popolari de Melenchon si pigat 182 deputaus, su partidu de su presidenti Macron 168 e su Rassemblement National de Le Pen 143. Una sessantinua cussus chi andant a si Republicanus.
Sa manca, a dogna manera, est ancora atesu de is 289 segius chi abbisongiant po si pigai sa magiornatzia e su centru de Macron non tenit perunu contu de si ponni paris chi ddue est Melenchon. In su mentris, su primu ministru Attal s’est dimitiu.
Macron est sempiri prus cunvintu de su sceberu chi at fatu: “Sa genti chi est andada a vota, chi est su 67%, provat ca is francesus boliant nai sa insoru”.
De sa parti de Melenchon invecias fueddant is colonellus Manon Aubry, Mathilde Panot e Manuel Bompard: “Macron ndi bessat a foras o pongiat unu primu ministru intru de sa parti nosta. Eus fatu una politiga chi at uniu sa genti e seus segurus ca at essi unu modellu de sa manca in totu su mundu”.
In su mentris chi sa manga festaia in is orrugas e in is prassas, Marine Le Pen e sa parti sua fueddat de “alleantzias contras natura” e Jordan Bardella at chistionau: “A dolumannu – at nau – custas alleantzia de Macron e Attal cun sa manca radicali betant sa Francia in is manus de Melenchon”.
Màuru Mura
Lunis, s’otu de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/mondo/2024/07/07/melenchon-il-nuovo-fronte-popolare-deve-governare_974b54d0-3b2a-42fa-9481-a559b438abe7.html
