Un’atra partida acabbada po 1-0: a pustis cussa cun su Verona, eris in Firentze. Ma custa borta po s’atra scuadra. Ma, Davidi Nicola, in segus, candu chistionat, agatat su matessi indicus bonus: “Custa partida nosi fait cumprendiri cosas medas. In cursa eus fatu meglius de sa Fiorentina, aici comenti eus poderaus de prus sa bocia e in sa parti de duas de sa partida eus fatu meglius meda de cussus. In sa matessi parti de duas eus postu in campu pensadas noas chi, forsis, in sa parti de unu non podiaus fairi. Sa partida est stetia giogada in sa manera giusta, difatis a s’acabbu a is piciocus apu nau ca candu eus a essiri ancora prus barrosus po giogai, e non pensendu a s’aversariu o a essiri in domu o foras, is puntus ant a lompiri de seguru. Oi a su Casteddu minesciat sonumancu unu puntu”.
Nicola morrungiat po comenti sa Fiorentina at fatu su gol: “Po mimi su gol est in fuorigioco poita Kouamé strobbat in manera manna sa mirada de Sherri. Ma non fait nudda, tocat a tenni passientzia”, spiegat Nicola. “E non feti po mei: chi si frimat s’imagini est aici, Kouamè strobbat. Custu non bolit nai ca eus perdiu poita est stetiu fatu custu sceberu. Cussu chi nau est ca Cataldi ponit sa bocia in su ingrugiu de is palus e nosu in dd’una atzioni oguali eus aguatau una deviatzioni. In sa parti de duas depiau cicai sa calidadi in su giogu, massimamenti in s’urtimu passagiu e a suta de sa porta. Ma abbisongiat finas a nai ca su fraigamentu de sa Fiorentina e de su Casteddu est diversu meda”
Nicola fueddat finas de su cambiu intru de Viola cun Gaetano: “In sa parti de unu de sa partida Nicolas no est arrennesciu a nosi fairi torraia a partiri cun sa calidadi chi tenit. Isa sa parti de duas est imbucau unu giogadori comenti de Gaetano po donai cussa calidadi chi nosi fut mancada. A dogna manera bogliu chi is piciocus cumprendat ca podint fairi puntus a petotu e tocat a si dda giogai in dogna campu”.
Màuru Mura
Lunis, su noi de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=pH69LV5GxWk
