Si ddue agatat finas Alissandru Vinciguerra, chi est su capitanu de sa scuadra de is giovunus de su Casteddu allenaus de Fabiu Pisacane, intru de is binticuatru tzerriaus de Davidi Nicola po sa partida de Coppa Italia Juventus-Casteddu. S’atacanti, nasciu in su 2005, est partiu cun s’orrestu de is cumpangius de sa scuadra de is mannus, po s’otavu de finali, in dd’una partida feti, de oi in Torinu. Sa partida s’at a giogai a is noi oras de merì e at essi ghiada de s’arbitru Feliciani. Vinciguerra s’at a setziri a su costau de Nicola e de s’orrestu de is cumpangius. E si scit giai poita eris s’allenadori piemontesu de su Casteddu at giai fatu connosciri chini at a cumentzai a giogai. Ma, su piciocheddu at a podiri bisai sa possibilidadi de imbucai intru de sa partida, ca aici iat essi sa borta de unu chi giogat cun is mannus. A dogna manera, Alissandru Vinciguerra at sceberau su numuru de ponni in is palas de cussa magligedda orrubiu-asula: su trintacincu!

Funt tres is giogadoris chi no ant a sighiri s’orrestu de sa truma in Piemonti. In prus de Zito Luvumbo, chi s’est strupiau a su bursu de su pei mancosu sabudu passau in sa partida perdia cun s’Atalanta po 1-0, funt abarraus in Sardigna finas Jakub Jankto, chi ancora intru campionau e coppa Italia no at mai testau su campu, e Adam Obert chi est a dolus po s’entiri.

A dogna manera custus funt is giogadoris tzerriaus de Davidi Nicola po cras a merì:

 

Portieris:

Giusepu Ciocci, Simoni Scuffet e Alen Sherri;

 

Giogadoris de difesa:

Tomasu Augello, Paulu Azzi, Pitanu Luperto, Yerry Mina, José Luis Palomino, Mateusz Wieteska, Grabrieli Zappa e Nadir Zortea;

 

Giogadoris de mesu campu:

Michel Adopo, Alissandru Deiola, Matia Felici, Giuanniluca Gaetano, Anoine Makoumbou, Răzvan Marin, Mateo Prati e Nicolas Viola;

 

Giogadoris de atacu:

Giuanniluca Lapadula, Kingstone Mutandwa, Lionardu Pavoletti, Orrobertu Piccoli e Alissandru Vinciguerra.

 

Màuru Mura

 

 

 

Martis, su dixiaseti de mesi de Idas de su 2024

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://calcio.oasport.it/2024/12/16/ci-sara-turnover-in-coppa-italia-probabili-formazioni-e-spazio-per-le-singole-linee-le-scelte-delle-big/