Si torrat a chistionai de una serrada po totus, comenti cussa de ocannu passau in is mesis de martzu e arbili, po binciri sa pesta de su Covid-19. Erriscus mannus si bint in su benidori po mori de sa varianti ingresa chi est spainendusì in totu s’Italia.
Su primu a ndi chistionai est stetiu su specialista, chi trabagliat a costau de su ministru Speranza, Walter Ricciardi, ma, a apustis, si funt aciuntus su studiosu de pestas de su Sacco de Milanu Massimu Galli e un’atru studiosu comenti de Andria Crisanti, chi in Sardigna est su consulenti po “Sardi e Sicuri”. Finas s’ISS narat de torrai a serrai e, in Europa, su Ecdc, est de acordiu.
Ninu Cartabellota, diretori de sa Fondazione Gimbe ddu narat craru e tundu: “Chena un’incungiamentu po totus e sonumancu po duas cidas, at a tocai andai a innnatis, po totu ocannu, comenti seus fendu imioi”.
Partit cun custu pensamentu su guvernu nou de Mariu Draghi. In su mentres in Sardigna is numurus de eriseru agiudant a biri unu benidori de colori orrosa: feti cincuantases impestaus nous e sa positividadi calat a su 0,1%. Numurus chi faint pensai a su presidenti Solinas po is prossimas cidas e mesis: chini bolit benni in Sardigna depit tenni su certificau chi fueddit de negadividadi.
Est cuntierra, a dogna modu, in pissu de is fueddus de Cristanti, non po airi chistionau de “una serrada inderetura”, mancari, comenti giai nau, is numurus bonus de sa Sardigna, ma po cussu chi pensat de is tamponis lestrus, is matessi chi at umperau po portai a castiu sa positividadi in is provincias sardas. Custus is fueddus: “Tocat a ci scavulai a mari custus tamponis lestrus, funt comenti de pistolas cun abba contras su virus”. A pustis at cambiau: “Su tamponi lestru andat beni po cussu chi seus fendu in Sardigna, ma non serbit po atru e non balit comenti de certificau!”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto:https://www.ilmeteo.it/notizie/coronavirus-la-prossima-estate-non-si-potr-andare-in-spiaggia-il-prof-crisanti-cancella-le-vacanze-dettagli-134720
