Sighit a ispantai su trabagliu de Lionardu Semplici cun su Casteddu. Eriseru puru, in Genova cun sa Sampdoria, su Casteddu ce dd’at fata a paregiai una partida chi pariat perdia. A innnatis, a su cumentzu de sa partida iat segnau su capitanu Joao Pedro (cun cussa de eriseru funt imoi trexi is gol de su brasilianu) e, a pustis, chi sa Sampdoria iat furriau su arresultau cun dus gol in pagu tempus, a s’urtimu segundu de giogu Nainngolan at torrau a ponni a postu totu. Non si funt arrendius is piciocus de Semplici e sa gana de non torrai in Sardigna cun is manus sbuidas a sa fini at premiau. Unu puntu, finas chi po tempus meda si ndi funt bisaus tres, fait stesiai su Torino de Nicola, chi imoi comenti imoi, parit sa scuadra posta peus.

C’at de nai ca chini est in denanti no est currendu e chi su benidori po is orrubius asulus de su presidenti Giulini est craru: dogna partida podit arregalai puntus po si sarvai de ci calai in serie B. Pariat totu perdiu, invecias est bastau a cambiai allenadori e totu s’est ponendu a sa manera giusta.

Custus is fueddus de s’allenadori toscanu, una borta acabada sa partida: “Eus fatu una grandu partida e tentu ocasionis mannas po fairi un’atru gol, candu fustis giai bincendu. In su segundu tempus eus sunfriu unu pagheddu, tocat a essiri prus abistus, ma sa scuadra m’est pragiu e pensu chi nosi menescit a torrai in Sardigna cun d’unu puntu”. “Non pensaia de fairi seti puntus in tres partidas, at sighiu a nai Semplici, ma ancora no eus fatu nudda ca su campionau est longu, finas chi sa scuadra est crescendu. Candu m’ant tzerriau po benni a Casteddu non c’apu mancu pensau poita connoscia prus de unu giogadori e scia ca nde dda podia torrai a pesai”.

Cun is giornalistas at chistionau finas Radja Nainggolan: “Eus fatu unu bellu primu tempus de averas, nosi fustis spassiendu. Depeus cicai de non fairi sbaglius comenti cussus de is dus gol chi eus pigau, ma trabagliendu, comenti seus fendu at essi facili. Mi fui arriolendu poita sonumancu unu gol dogn’annu ddu ia fatu sempiri, ma fui trancuillu e scia ca iat essi erribau. Eus pigau s’orruga giusta cun Semplici, teneus calidadi meda e mi dispragit po Di Francesco, ca cun cussu puru eus fatu bellas partidas ma no erribanta is puntus”.

Sa prossima partida est de cussas chi fait apilurtzai, difatis dominigu, a is ses de merì, erribat sa Juventus de Pirlo!

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 Foto: https://sport.sky.it/calcio/serie-a/2021/03/07/sampdoria-cagliari-risultato-gol