nicolinoNicolino Locche nascit a Tunuyàn – una citadi argentina de sa provincia de Mendoza, a centu chilòmetrus de su cunfini cilenu – su 2 de cabidanni de su 1939. Giustu sa dî agoa chi, in su Continenti Beciu, cumentzat sa segunda gherra mundiali. Su babbu cun sa mama sua benint de Sardìnnia. A cantu si narat in internet, própiu po si fuiri de un’Ìsula, e de una natzioni, chi est imbuchendu in-d-unu caminu malu e longu de fàmini e de morti. Nicolino cumentzat a pipiu a fai sa boxe: a 9 annus. Mancai non tengiat unu fìsicu matucu meda, e a mannu lompat a s’artària de unu metru e sessantotu feti, sa ténnica sua de difesa est aici bona de ddu fai diventai – segundu sa International Boxing Hall of Fame – unu de is cumbatentis de ring prus famaus de dónnia tempus. S’annomingiu sû? “El intocable”, su chi non si podit aciapai.

 

Locche tenit una ténnica de defesa crosidadosa, ùnica, chi oi in dî est cunsiderada una de is mellus chi sa boxe apat mai amostau. Sa guàrdia de Nicolino est bascia, a bortas finas cun is manus in palas de sa schina, in-d-una spétzia de turrùciu. Locche movit sa conca a dresta e a manca, abbascendudedda in deretura po non buscai is punnigosus de s’aversàriu. Si fait brullas de issu, ddi fait pigai su nervosu, ddu fait fadiai e amachiai. Finas a candu cuddu iscudit luegu a sa tzurpa e aberit sa guàrdia sua. Tandu Nicolino ddu podit fulminai. Is nùmurus de Locche funt crarus: 135 cumbatimentus e 117 bìncidas, 14 paregius, 4 iscunfitas feti.

 

Nicolino cumentzat sa carrera sua de professionista in su 1958, e cumbatit finas a su 1976. Sa categoria est cussa de is welter junior, is chi in italianu si nant superleggeri, chi andant de unu pesu de 135 a 140 libbras (61,24 – 63,50 kg). Sa dî prus nodia po cust’atleta mannu de sa boxe est su 12 de mesi ’e Idas de su ’68, candu a Tokyo otenit su tìtulu de campioni de su mundu, bincendu a sa dexima ripresa contras a su campioni in càrriga Paul Takeshi Fuji, staduniesu de arréxinis giaponesas. A parri de is cumentadoris argentinus, Fuji – istracu e foras de sei – lassat su ring poita no arrennescit a ciapai s’aversàriu.

 

Su bideu de youtube chi documentat su cumbatimentu, fait biri craramenti ca custus cumentus, mancai bengiant de parti argentina, non funt brullas. Locche at diféndiu su tìtulu po ses bortas, e dd’at pérdiu su 10 de martzu de su 1972 contras su panamesu Alfonso Frazier Peppermint. S’istória de Locche El intocable si serrat su 7 de cabidanni de su 2005 in Las Heras, a s’idadi de sessantases annus.