Is giovunus giogadodoris de su Casteddu imbucant in is contus mannus de sa sociedadi de su presidenti Giulini. Sa scuadra, allenada de Fabiu Pisacane, bincit in finali cun is giovunus de su Milan po 3-0 e abuddat a su celu sa prima Coppa Italia.
Mericeddu speciali in s’Arena Civica “Giuanni Brera” de Milanu, indenanti a una meca de genti lompia giai de sa Sardigna e giai de s’rrestu de s’Italia de sus. Sa partida non si dd’at perdia nemancu Tomasu Giulini chi, paris a s’allenadori napoletanu, est cussu chi nd’at pesau sa scuadra. Una vitoria, est a nai, chi finas a tempus pagu, non si podiat mancu pensai. Intru de is tifosus chi s’agataiant setzius, finas Nigolò Barella.
Sa partida s’est decidia, massimamenti, intru de sa metadi de sa parti de unu, candu su capitanu Vinciguerra, a su minutu de 21, e Bolzan, a su minutu de 36, portant su Casteddu a cumandai po 2-0. Su 3-0 lompit in sa metadi de sa parti de dus, candu unu tiru de Trepy, po mori de Paloschi chi tocat sa bocia. A nudda, dapoi, serbit su disisperu de is milanistas chi, a s’acabbu de is primus corantacincu minutus, faddint unu rigori con Bonomi chi podiat torrai a oberri sa partida etotu.
Su Casteddu a sa finali fut erribau stupendudenci a innantis sa Fiorentina e a pustis sa Juventus. Pisacane at cumentzau sa partida cun con Iliev, Cogoni, Pintus, Franke, Arba, Balde, Liteta, Marcolini, Grandu, Bolzan e Vinciguerra. In segus funt imbucaus finas
Langella, Achour, Trepy, Malfitano e Sulev. Su Milan, allenau de Guidi, at arrespustu fendu cumentzai sa partida a Longoni, Bakoune, Dutu, Paloschi, Magni, Comotto, Hodzic, Eletu, Comotto, Liberali, Bonomi e Sia.
Allirgha manna po totus candu s’arbitru at sulau po tres bortas: dì spantosa po su Casteddu e po totu cussus chi ddu poderant in su coru… e finas po sa scuadra de is mannus chi castiant cun fidi a is partidas benientis.
Màuru Mura
Giobia, su dexi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=sh0EhBLZQPY
