In sa Champions League de fubalu, chi ocannu at mudau totu s’andamentu diventenduru unu campionau e non una giogada cun su paris de is gironis, feti s’Inter, po cantu pertocat is scuadras italianas est imbucada in is primas otu. Paris a sa scuadra de Inzaghi funt andadas a innantis in atras seti, est a nai, in oridini de puntus: Liverpool, Barcellona, Arsenal, Atletico Madrid, Bayer Leverkusen, Lille e Aston Villa.
Po atras tres scuadras italianas, Atalanta, Milan e Juventus, s’ant a giogai is sparegius po lompiri a is otavus. E custu mengianu in Nyon si funt amostaus in custa manera: sa Juventus de Thiago Motta si dd’at a giogai cun is olandesus de su Psv Eindhoves, su Milan de Sergio Conceicao cun su Feyenoord, scuadra su matessi olandesa e s’Atalanta de Gasperini, invecias contras de s’urtima scuadra de is torradas a piscai, est a nai su Club Brugge, scuadra belga chi bestit is matessis coloris de sa scuadra de Bergamo.
Custus totu is partidas chi s’ant a giogai martis undixi e mercuris doxi de friargiu po cantu pertocat sa de unu e su martis dixiotu e mercuris dixiannoi, sempiri de friargiu, duncas una cida a pustis, po cantu pertocat sa partida de dus: Club Brugge-Atalanta, Sporting Cp-Borussia Dortmund, Manchester City-Real Madrid, Celtic-Bayern Monaco, Juventus-Psv Eindhoven, Feyenoord-Milan, Brest-Psg e Monaco-Benfica.
Una borta chi s’ant a connosciri is scuadras chi ant a bessiri bincidoras de custa cuntierra, su cenarba bintunu de friargiu, sempiri in Nyon, ddu at essi su sortegiu po is otavus de finali de custa Champions League noa. S’Inter, comenti eus nau sa sola scuadra italiana a passai chena sparegius a is otavus, at a gogai cun sa scuadra chi at a bessiri bincidora de sa cuntierra intru de Juventus-Psv Eindhoven e Feyenoord-Milan.
Duncas at a podit essiri unu derby italianu. Ma eus a benni a biri, ca sa bocia est sempiri tunda.
Màuru Mura
Cenarba, su trintunu de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.primevideo.com/-/it/detail/UEFA-Champions-League/0GJQIWAVC966GSJFDEAS197SP3
