Iat nau de airi pensau calencuna cosa de nou e de atru po sa partida de su Casteddu cun su Bologna, ma is mudamentus de Davidi Nicola non funt bastaus: funt lompius dus gol de su Bologna e partida perdia po 2-1. “In sa parti de dus non eus giogua pulius”, is fueddus de s’allenadori casteddaiu, chi sighit: “Tocat a donai miniscimentu mannu po su gol de dus, su Bologna tenit calidadi manna, in su mentris chi in su gol de unu non si seus fatus agatai scidus. Chi ce dda feus a si ndi scidai in situatzionis aici ant a lompiri is puntus”. Sa parti de unu dd’est pragia: “Ci creu. Custus piciocus faint partidas aunia nemus ddus ponit cun is palas a su muru. Ma tocat a non si dromiri”.
Su paregiu de su Genoa, in sa parti de s’acabbu, contras de s’Empoli fait in manera chi su Casteddu si poderit tres puntus in prus de sa matessi scuadra toscana. Chi, oi, iat essi in serie B. “No est custu s’obietivu nostu: tocat a creiri in cussu chi feus. Tocat a disigliai, finas candu is cosas andant mali, sa gana de si portai a domu calencuna cosa. Abbisongiat a migliorai cussu chi no andant e, po custu, trabbagliai sempiri de prus, cun atentzioni manna po totu. Ma Nicola torrat a a nai: “Is puntus si podint fairi contras de cale chi siat scaudra. In is urtimas partidas eus atobiau Juventus, Atalanta e Bologna, ma su disigliu miu est chi sa scuadra mia si dda gioghit contras de totus. Tocat a tenni barra e faci manna”.
Luvumbo, chi est torrau in is primus undixi a pustis de noranta dis, est bessiu dapoi de un’origedda ca s’est strupiau un’atra bia. “Eita tenit? No ndi eus ancora chistionau, perou at amostau una manera de giogai chi podiat donai a pensai a su Bologna. Ia finas pensau de ponni a Pavoletti, ma bolia calencuna chi podiat giogai intru de metadi campu e atacu po ponni in movimentu a Piccoli. Tengiu abbisongiu de cuberai a Gaetano. Deu creu in piciocus mius, ma contat finas sa capassidadi de sa scuadra nemiga. No est facili a ddus ponni palas a muru”.
Cenarba chi lompit, a is noi mancu cuartu de merì, in s’Unipol Domus contras de Su Genoa de Vieira sa partida benenti po su Casteddu.
Màuru Mura
Lunis, su tres de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=kI4JKQRXHBk
