S’annu nou de su 2025 in Sardigna no at essi una festada pitica, ma surra de atobius chi at a fairi baddai totu s’Isula. S’assessorau a su Turismu at lamau custa manifestada “Capodanno 2025 in Sardigna, totu un’atra musica!”. Su matessi assessorau eris at fatu connosciri totu cussu chi s’at a fairi in Sardigna po s’urtima noti de su 2024.
Dixiasetti funt is cumunus chi ant alluiri is giogus de custu acabbu de annu e cumentzu de annu nou e sa chistioni at a pertocai nominis mannus de su rock italianu ma finas giovunus de sa musica pop de dance. Sa regioni at sceberau de donai dinari a innantis a cincu citadis de importu, est a nai Casteddu, Tatari, Salighera, Casteddu Sardu e Terranoa, e dapoi ant a a preniri su totu atrus doxi cumunus.
Su merì de su trintunu de custu mesi in Tatari at essi in pissu de palcu sa cantanti toscana, famada in totue, Giuanna Nannini, in su mentris chi in sa capitali sarda at essi Stewart Copeland, chi est unu spantosu baterista de is Police a fairi badda sa genti chi at a lompiri. A pagu tretu de caminu, in Igresias s’ant a amostai subra su palcu Le Vibrazioni e Il Pagante
In Salighera, a intru de s’editzioni numuru bintinoi de su “Cap d’Any”, at a arregalai spantus de musica: su trinta ant essi is DJ storicus Albertino, Fargetta, Molella e Prezioso a portai musica in sa prassa e invecias po sa noti de s’urtimu de s’annu ant a bessiri in pissu de palcu is Negramaro. Non at abarrai a castiai Casteddu Sardu chi at ascurtai a Elodie e Irama.
In Gaddura, in su Brin de Terranoa s’ant amostai is Pinguini Tattici Nucleari e is Boomdabash e in Figari, a pagu tretu, s’at a festai cun Fred De Palma. Aici etotu s’at a festai in Nugoro e sa genti at a podiri cantai paris a Giusy Ferreri. In Bosa est Irene Grandi sa stedda cun prus lugi.
Sa giovana Gaia in Aristanis, Max Gazzè, acumpangiau de sa truma Jazz de sa Sardigna in Durgali e is Nomadi in Desulu prenint totu su paris de custa festa manna.
Màuru Mura
Giobia, su doxi de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.friendsandpartners.it/artisti/gianna-nannini
