Funt trexi is candidaus sardus po sa torrada de is Europeas de s’otu e de su noi de Làmpadas chi ant a lompiri. A is otu de merì de su 30 de arbili acabbaiat su tempus po s’ammostu de is listas in is cincu circoscritzionis in is calis est cumpartzia s’Italia. Cussa aunia est sa Sardigna est si tzerriat “Circoscritzioni Isulas” e cun sa Sardigna etotu si ddue agatat finas sa Sicilia. Est a nai ca est una bregungia manna, poita sa Sicilia tenit abitantis de prus, ma meda e at essili dificili a ci bessiri unu sardu.

A dogna manera, custus funt is candidaus sardus:

Po is fradis de s’Italia su parlamentari Sarbadori Deidda. Est a nai finas ca sa presidenti de su guvernu, Giorgia Meloni, est candidada, po pinnigai votus, in totu is cincu circoscritzionis. Fortza Italia paris a is Riformadoris e a Nosu moderaus si funt postus paris e ant decidiu sa candidadura de su riformadori Migheli Cossa e sa sindiga becia de Lula, chi s’est giai setzia in is bancus de Strasburgo. Sa Lega, invecias, abarrat a sa sola e at postu in campu sa senadora becia de Nugoro, Lina Lunesu.

Is Steddaus scumitint in pissu de su sardus in sa lista: Cintzia Pilo e Mateu Porcu. Is Birdis e Orrubius ant sceberau su coordinadori regionali de is Birdis, Franciscu Muscau, in su mentris chi Manca Benidora iat giai sceberau a Ilaria Salis, sa maista de arreiginis sardas impresonada de unu bonu arratu de tempus in Ungheria. Su Partidu Democratigu at candidau una grandu femina, chi giai est stetia, una bona pariga de annus a immoi, presidenti de sa Provincia de Casteddu: Angila Quaquero.

Candidaus po su movimento de Micheli Santoro “Pagi, terra, dignidadi” funt Gianni Fresu, professori in s’universidadi chi in tempus passau est stetiu segretariu regionali de Rifondatzioni Comunista, cun Elisa Monni. Sa coordinadora regionali de su Populu de sa Familia, Brabara Figus, est candidada cun Libertadi, su paris eletorali de Cateno De Luca.

Atzioni de Calenda, invecias, at candidau Nigola Trudu e po is Stadus Unidus de s’Europa sa canidada sarda est Pierina Putzolu de su partidu Socialista.

 

 

 

 

Màuru Mura

 

 

 

Mercuris, su dus de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.affarieuropei.gov.it/it/comunicazione/approfondimenti/ee24/