Fut una partida difilici meda po su Casteddu, cussa de eriseru a merì contras de sa Juventus, ma a bortas Davidi bincit cun Golia, custa borta no est andada aici! Tres gol de Cristiano Ronaldo, su campioni portoghesu, in su primu tempus ant permitiu a sa scuadra sua de torrai a domu insoru cun tres puntus in prus in classifica. Po su Casteddu ita cambiat? Nudda, ancora sa bataglia po non ci calai in serie B est oberta a totus. S’est acostiau su Parma, chi at bintu sa partida contras de sa Roma, ma ant perdiu Crotone, Torinu, Spezia e Benevento. Parint, imoi comenti de imoi, custas is scuadras chi s’ant a giogai sa permanentzia in Serie A e dominigu chi benit su Casteddu andat in Liguria, po si dda giogai cun su Spezia de Italiano chi est a innanti de cuatru puntus. Binciri cussa partida, o sonumancu a non dda perdiri, est importanti prus de cussa de eriseru. Sa Juventus fut inchieta meda ca sa cida passada ce dd’ant bogada a sonmu de corru de sa Champions League, ma candu tenis in campu unu che Ronaldo, massimamenti cun is scuadras prus debilis, partis cun d’unu vantagiu mannu.
Su presidenti Tomasu Giulini at chistionau a s’acabu de sa partida e non dd’as mandadas a nai, est stetiu craru craru: “No eus fatu una bella partida e custu si podit nai. A dolu mannu non c’eus postu su coru, comenti si depiat fairi. Su spetu miu est chi cun su Spezia siat un’atra cosa. Soi deludiu meda, ma creu finas chi Cristiano Ronaldo ci depiat essiri bogua de s’arbitru, is arregulas funt craras: at postu in perigulu su portieri nostu cun d’una intrada legia meda”. Giulini at chistionau de custas cuatru partidas cun Semplici: “At betiu cussu chi nosi serbiat, ma oi s’est bidu pagu e creu chi ddu scipat issu puru. Po nosi sarvai tocat ancora a cumbatiri meda”.
Semplici fut deludiu su matessi: “Boliaus provai a fairi nosu sa partida ca chi ddus fais giogai, is giogadoris de sa Juventus, funt perigulosus, ma forsis est curpa mia a no airi fatu cumprendiri, a is giogadoris mius, s’importantzia manna de custa partida. De is arbitrus non ddi chistionu mai, po mei cussu chi contat est a trabagliai po ndi bessiri, cantu prus a innanti, de custa situatzioni”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://sport.virgilio.it/serie-a-cagliari-juventus-1-3-le-foto/serie-a-cagliari-juventus-1-3-le-foto-4-679766/
