Su babbu e sa mama de Martina Colombaro, sa piciochedda de catodixi annus bocìa a corpus de perda, torrant a biviri, a s’imbessi, is fueddus e su biviu de su sposu chi s’est incurpau. Ddi narant Alessiu Tucci e at lompiu is dixiannoi annus. “Issu – narat Marcellu Carbonaro, su babbu – nos at agiudau in sa cica. Deu tenia cussu chi at bocìu a figlia mia in pissu de sa vetura e non ddu scia. Candu dd’apu tzerriau, issu e totu m’at arrespustu: ‘Deu apu fatu su caminu miu e Martina at sighiu s’andala sua’. Alessio m’at nau ca fut andendu a si samunai: a pustis su bocidorgiu est torrau a domu, s’est samunau, at papau e in segus est bessiu”.
Non si donat pagi nemancu sa mama de Martina, Enza Cossentino, chi eris at pediu su presoni a vida po Tucci, aciungendu “chini dd’at fatu dd’at a pagai”. “S’at fatu una docia, est a nai ca si nd’at tirau s’orroba bruta de candu at bocìu e non si connoscit eita acabbu apat fatu su bestiri”, pensat immoi. “Alessio fut cun nosu po cicia a Martina e immoi soi pensendu ca ddu ant acapiau in domu mia. Immoi ca non tengiu prus una figlia non sciu chini m’est donendu sa fortza, forsis is tres angilus chi tengiu in celu: mama mia, babbu miu e sa matessi figlia mia”, aciungit. “Tres cidas a oi apu scipiu ca Alessiu at donau unu ciafu a Martina – arregodat – deu tenìa una cena in domu e non eus possiu chistionai, dapoi in s’aposentu de aunia dromiat, Martina, at nau de airi aguantau giai meda, finas unu ciafu. Martina m’at sempiri chistionau beni meda de Alessiu, ma oi in conca tengiu sa duda chi mancari siat sussediu de prus e chi figlia mia no apat scoviau”.
Po cantu pertocat su caminu de sa giustissia, cras in su presoni de Poggioreale de Napoli, ddu at essi s’udientzia po s’acapiu de Alessio Tucci ca est incurpau de airi bocìu sa piciochedda e dde airi atacau su corpus. Su piciocu est difendiu de s’abogau Màriu Mangazzo e sa Procura de Napoli su tres de làmpadas at a donai s’incarrigu a su dotori po s’autopsia chi s’at a fairi sa dì e totu.
Màuru Mura
Cenarba, su trinta de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.romasette.it/femminicidio-di-martina-carbonaro-terragni-le-famiglie-chiamate-in-causa/
