1. Mura (

……………tempus che at passadu

totus sos ch’a sa gara azis istima

ma a bos improvisare calchi rima

ancora calchi cosa mi at restadu.

Un’aterunu tema mi at tocadu

totu diversu ’e su chi aia prima:

de bos lu narrer mi sento in obbligu,

como tocadu mi est su babbu antigu.

 

2. Màsala (45”)

Sa prima parte l’aimis lassada

e amos riposadu unu momentu

ma prosighimos su divertimentu

cantende in palcu a s’ispensierada

annuntziende un’àteru argumentu

po custa paga zente ch’est restada.

E chissà si l’ispasso e la recreo

ca su fizu modernu l’apo deo.

 

3. Mura (1’02”)

Mi fio abbituadu a fritu e caldu

prima comente oe inue abbito

e de s’ocasione nde aprofito

a lu narrer cun tantu rigualdu:

dogni manzanu pesaia chito

e-i su note colcaia taldu.

Como dae cuss’edade che so fora

ma peso chito e colco taldu ancora.

 

4. Màsala (45”)

Custu tema chi an bogadu a pizu

no at a ponner a mie in tristura.

S’abbaidades a mie cun Mura

tra nois ja bi at bonu assimizu

ca amos finas sa própia istatura

e ja s’’idet chi semus babbu e fizu

solu chi deo so pius rassitu

ca no m’isponzo a caldu e ne a fritu.

 

5. Mura (1’00”)

Deo de babbu mantenzo s’impreu

e-i sa veridade nudda ocultat

puite totu custu mi resultat,

bos lu naro comente est beru Deu

puite sa malasolte ’e fizu meu

a da chi lu cussizo no mi ascultat.

Deo so sempre in cuddu puntu fissu

ma issu faghet su chi cheret issu.

 

6. Màsala (42”)

Tra nois no faghimos aggualu,

parimos su dimóniu cun Deu

prite deo so téteru che palu

e tue non ti fichis mancu reu

ma si essera unu fizu malu

deo non nd’apo culpa, babbu meu.

Ne mi dispero e ne mi meravizo

ca est sinnu chi a babbu mi assimizo.

 

7. Mura (1’04”)

Ma tue s’assimizu no lu azecas

e no est beru su chi nende ses.

Cun sas tentatziones tropu pecas,

in logos malos che pones sos pês

ca dogni note da sas discotecas

mi nd’acudis sas duas e sas tres:

apagas su chi bramas e disizas,

no est beru chi a mie ti assimizas.

 

8. Màsala (43”)

Dogni rinfaciu tou mi est castigu,

a mi lassas in pasu e chietu?

Si so modernu e no so antigu

ammenta chi no est unu difetu

ca tue a su trabagliu l’as afetu

e deo de sas festas so amigu

como chi su trabagliu est fora ’e usu

e sas festas piaghen de piusu.

 

9. Mura (58”)

In pius d’esser babbu, afetzione

t’apo de ateruna calidade

chi t’apo sempre tentu atentzione

da cando fis in sa minore edade

e-i sa mia generosidade

ti l’apo posta a dispositzione

ca so cuntentu ch’in domo mia abbites

però non chelzo chi ti nde aprofites.

 

10. Màsala (41”)

No lu giudiches male a Marieddu

si de annos nde tenet degheoto.

Tue chi as in manu su ’acheddu

e deo senza ’acheddu currer poto:

si culzo, culzo a caddu a sa moto

e tue curres cun-d-un’aineddu.

Làssal’istare iscapu s’animale

ca a ti che setzer susu faghet male.

 

11. Mura (1’01”)

Lassa sa moto chena comporada,

non ti ponzas sa vida a su bersagliu.

Fizu meu, cumitis un’isbagliu

e che podes bessire fora istrada

ma da chi ti faeddan de tribagliu

est peus de ti dare un’istocada.

A su chi naro pone mente e caglia,

lassa sa moto, Màriu, e tribaglia.

 

12. Màsala (40”)

No so pensende a bama ne alzola,

a da chi penso a tie nd’apo dolu.

So delicadu e tipu ’e iscola,

babbu meu, trabaglia tue solu

chi ses semper bufende piritzolu

e deo so bufende coca cola

ghiaciada e frita che-i su nie:

non m’’iden imbriagu che a tie.

 

13. Mura (56”)

A usas aterunu galateo,

a-b-ite mi che passas a igue

ca su tribagliu no nde at mortu creo

antzis sun fentomados in totue:

si non so tribagliende moltu deo

no penso chi bi molzas mancu tue.

Sias a su chi naro coerente:

Màriu, a babbu tou pone in mente.

 

14. Màsala (41”)

Ti ponzo in mente, o babbu Frantziscu,

cando subra su palcu ti nde arritzas.

Sas maladias mias sun paritzas

chi so allérgicu a caldu e a friscu:

s’annu passadu jughia sas tritzas

ocannu juto sos pilos a discu,

mi los at fatos su parruchieri

chi connoschet su sou mistieri.

 

15. Mura (1’01”)

Ma cun custos faeddos finimilos

e in sa veridade pensa e crê.

Deo si de sa domo so su re

ti so incaminende in mezus filos:

su barbieri chi t’at fatu sos pilos

a cantu paret est peus de te.

E bido chi de acordu bos ponides

chi tocare sas manos bos podides.

 

16. Màsala (40”)

Babbu meu si ch’est fatu antzianu

ma pro cant’isto ’iu a issu adoro:

unu pensionadu ’e bonu coro

chi su ‘inari mi ponet in manu.

A issu bastat su mesu toscanu

e deo invece fumo sa Malboro:

gai paret sa ’uca ’e babbu Mura

su fumajolu ’e una cobeltura.

 

17. Mura (52”)

Ripito, a babbu tou pone in mente:

non naro a ti leare a sa bratzeta

però t’imparat sa via ereta,

la deves osselvare frecuente.

Po ti fumare calchi sigareta

non diat esser su dannu niente

ma tenzo sas bideas dubbiosas

chi fetas usu de àteras cosas.

18. Màsala (40”)

In àteru non deves dubbitare,

babbu meu chi as s’alva bianca.

Su ’inari chi tenes in sa banca

si devet investire e impreare:

nos bendimos sa domo e-i sa tanca

e che jampamos a cudd’ala ’e mare

e nos ch’andamos a Sestri Levante

e comporamos unu ristorante.

 

19. Mura (56”)

A-i cussa domanda naro no,

antzis mi paret sa proposta mala.

No est chi mi ch’imbolo totu a pala

e sas proas lampantes ti nde do:

non brinco de su mare a s’àter’ala,

deo ja isto bene inue so.

A cussas partes non beto sa oghe:

tue si cheres abbarras inoghe.

 

20. Màsala (40”)

A fizu tou non trates cun ira

cun cussa limba chi jughes acuta.

Ma cando isto sempre gira-gira

non ti ponzo sa domo in bancarruta

e tando no as bidu chi sa lira

como ja est andende in isvaluta:

mancari ’etzu ja podes cumprèndere

chi su inari si devet ispèndere.

 

21. Mura (54”)

Ma narrer una cosa ti cheria

però tocat a tie a la cumprèndere.

E si la naro la deves intèndere,

non lu naro ca abbelzo buca ebbia:

fizu meu, sa pensione mia

lu ’ido deo comente l’ispèndere.

Ca so abbaidende a su progressu

la ponzo in banca e nd’amos s’interessu.

 

22. Màsala (40”)

Però non deves mandigare frasca

pensende a su ’inari e a s’ispesa

chi arrivadu che ses a betzesa

e no as bidu in vida mai Pasca:

tue ti jughes a coddu una tasca

e deo juto una cinepresa.

Sas cosas chi riprendo dogni die

ja torro a domo a las bìdere a tie.

 

23. Mura (1’01”)

Ma non cherzo ch’in pùbblicu mi esponza,

ti torro a repitire dae nou.

Dogni santu su santu cursu sou

at fatu e nd’est sa zente distimonza

ma a tie, fizu meu, ti est bilgonza

a viver de sa busciaca ’e babbu tou.

Bogatichelos tzeltos grillos fora,

bae e tribaglia ca as tempus ancora.

 

24. Màsala (40”)

Però de fizu si nde tenes unu,

ammenta, non lu deves castigare

e non mi fato su trabagliu a compare

chi antzis non piaghet a nisciunu.

Si m’abbratzo m’abbratzo cun Netunu

mi chi ’eto in sas undas de su mare

no che a tie in domo semper solu

chi ti sàmunas in su labiolu.

 

25. Mura (1’05”)

Deo totu sos annos de sa vida

passad’apo po fagher bene a tie

afrontende tempestas de abba e nie

in totas sete dies de sa chida

e como custa paga das a mie

chi dogni tantu mi faghes isfida.

Ma no est sognu chi ti realizas,

un’ateruna die ti nde abbizas.

 

26. Màsala (42”)

Si mi custringhes a tzertas fainas

ti crìticat sa idda ’e Silanos.

E tando a fizu tou l’arruinas,

o babbu ’etzu cun sos pilos canos:

si un’ojada mi das a sas manos

sas mias paren duas sinnorinas

e sas tuas sun totu malastrosas

puite sunu tostas e gallosas.

 

27. Mura (1’03”)

Deo sos gallos chi juto in sas manos

t’an fatu mannu, cumprensivu sias.

E-i sos gallos non sun maladias

antzis las ana sos totu antzianos

ma tue ’enis cun tzertas cumpagnias

a ora tardas e non sezis sanos.

Menzus pràtica cumpagnias bonas

e-i sas chi sun malas abbandonas.

 

28. Màsala (39”)

Ma a mie custu tema m’est tocadu

e mi l’at dadu sa dea bendada.

Che fizu tou pagos ja che nd’ada,

tue ses unu babbu fortunadu:

sempre mi bien in sa passizada

dae tota sa ’idda imbidiadu

e tue lu deves tènnere a onore

si as in domo unu fizu sinnore.

 

29. Mura (54”)

No andes a mi fagher un’arringa

s’a babbu tou li tenes afetu

però ti naro cun tanta lusinga

ca no chelzo mantenner su segretu:

eris mundende da suta ’e su letu

mi nd’est bessida a fora una siringa

de cudda forma ideale e cumposta:

cheria ischire chie che l’at posta.

 

30. Màsala (39”)

Si ses betzu no sias ribambidu

ca su chi naras nudda no est esatu.

Cando so bene pranciadu e pulidu

est in domo pienu su piatu

mi biden profumadu e ben’estidu

e sas pitzinnas mi ’enin in fatu.

E-i cussas chi ponen fatu a mie

che ruen susu e ch’adduran inie.

 

31. Mura (53”)

Fia de no lu fagher a ischire

prite sun cosas de narrer a cua.

A riguardu de sa vida sua

ca nachi ti cheres divertire

cuddu chi ti at dadu su estire

mi ch’at mutidu a sa butega sua

e cunfidadu m’at cun sa signora

chi chena pagadu lu tenes ancora.

 

32. Màsala (40”)

Ma ite cheres chi fure o chi peda

e si ses babbu ’onu mi perdona.

Sa vida costat cara e arrejona:

oe ’inari bi nde cheret meda.

Mama mia ja est fémina ’ona

sempre pronta a mi dare sa moneda

però timet sa mala limba tua:

su chi mi dat ja mi lu dat a cua.

 

33. Mura (47”)

Signu chi mama tua at isbagliadu

e cussas atziones las afeo.

Ch’isbaglies tue puru penso e creo

ma da chi su ’estire as comporadu

su cummerciante m’at rimproveradu:

a mala ’oza pagadu apo deo

da su capellu fina a sas caltzetas:

un’ateruna ’olta no lu fetas.

 

34. Màsala (38”)

No andes a chilcare pilu in s’ou,

sa manu in sa cusséntzia ti pone.

Poi so sempre in bistire nou

passizende de ’idda in s’istradone.

B’at calchi babbu chi a su fizu sou

su pane che li leat a presone:

deo intradu no bi so ancora

e ringràtzio a babbu si so fora.

 

35. Mura (52”)

Bistadu no bi ses in cussu zassu

a tenner s’esisténtzia in ruina

però su portafogliu no as rassu

ca jughes tropu tetera s’ischina

ca si ti ponen a cucuru in bassu

no ti che falat mancu una ’esina.

Tribaglia in custa vida e faghe prou

e no bistes apitu ’e babbu tou.

 

36. Màsala (41”)

Làssami istare sa buscia e sa cascia

e póneche sa crìtica a un’ala.

Si so modernu no so conca mala:

ti so fizu, no so una dilgrascia.

Deo ódio sa terra ca est bascia

no pot’’ider sa màniga ’e sa pala

e chie at inventadu tzapu e picu

ja si meritat sa pena ’e s’impicu.

 

37. Mura (54”)

Ma non mi paret una cosa giusta

chi siat dogni màniga segada.

Tue chi sa carena l’as robbusta

ja deves jugher sa manu aggallada

invece mi pretendes aligusta,

ispìgula cun màrmura e orada

cun peta ’e puma e cun peta ’e tudda

e deo papo pane cun chibudda.

 

38. Màsala (41”)

Ma deo so modernu unu giovanu

ca custa parte in manu mi nd’est ruta

e ringràtzio a Deu si so sanu,

o babbu meu, e no mi ponzas suta

ca mi nde peso chito su manzanu

e mi fat’una cursa cun sa tuta.

Cando ap’idea de illanzigare

no b’at mancu bisonzu ’e trabagliare.

 

39. Mura (56”)

Chi ti cheres leare ogni recreu

’ido ch’apo s’orija bene atenta

ma apo rejone de fagher lamenta,

si fat’isbagliu mi perdonet Deu:

a mie su biadu ’e babbu meu

mi leaiat sempre a manu tenta

a tribagliare fina in logu tortu

e po cussas fadigas no so mortu.

 

40. Màsala (40”)

Lassàch’a jaju in sa sepoltura,

sa zente molta ch’adduret chieta.

O babbu meu antigu analfabeta,

deo fizu modernu cun cultura

si ti fat’’ider sa muscolatura

tando as a narrer chi so un’atleta.

Ma tue jughes dae sas fadigas

sa gobba in pala e-i sa cara a prigas.

 

41. Mura (49”)

In sa bella piata de Siniscola

non chelzo a mi nde narrer cosas gai

ca tue postu m’as sempre in guai

no est chi siat una ’olta sola:

mancu cand’andaias a iscola

tue no as profitu àpidu mai.

Deo solu subbidu apo sos dannos

chi fis in tertza média degh’annos.

 

42. Màsala (40”)

Ma no mi mancan poderes e brios

no m’apas a bilgonza ne isfregiu.

Tue ’e totu sos babbos ses egregiu,

como arrivadu a otanta istios.

Decis’apo cun sos amigos mios

chi unu mese andamos in campegiu

e no so mancu unu fizu ispendone:

ti la salvas cun-d-unu milione.

 

43. Mura (58”)

Como sì chi cantende lu est su grillu

e narrer una cosa ti cheria

ca in su coro mi as puntu un’istillu

chi b’at motivos de malinconia.

Deo podia istare trancuillu

in domo cun sa pensione mia

e invece tribaglio note e die

a mala ’oza po campare a tie.

 

 

 

 

 

44. Màsala (38”)

Sa vida campagnola est mischina

chi no bi nd’at un’àtera uguale.

Si mi diverto ja no fato male,

como ponzo in ballu una femina:

apo detzisu a sa festa ’e Nadale

che leo a domo una biondina.

E a da chi b’arrivat una nura

at a fagher sos ballos babbu Mura.

 

45. Mura (49”)

Finimindela cun cussu tintinnu

e in àteras glórias ti ninna.

Làssala in domo sua sa pitzinna,

non ti permito a li fagher su tzinnu:

ajò ch’andamos a Monte Pitzinnu

e nos faghimos unu carru ’e linna

ca tenet sa montagna una virtude

chi faghet bene finas a sa salude.

 

46. Màsala (38”)

Ma lassa sa montagna, ite guai,

chi sa idea mia est ribbella.

M’apo leadu una pitzinna bella

chi t’at a narrer babbu e non babbai:

certu chi no at a esser verginella

ca sas modernas sunu totu gai

però si bella est Nostra Sinnora

nura tua est pius bella ancora.

 

47. Mura (53”)

Sighi a mie e de àteru faedda

dadu ch’as bozas de ti cojuare.

Ma in conca tua, fizu meu, ischedda

de custu nde deves dubbitare:

bastu chi siat bona sa pisedda

deo so prontu puru a l’atzetare

e de s’amore faghìdende usu

ma tribagliade dae como in susu.

 

48. Màsala (39”)

Sempre cun custa sólita cantone

chi àteru no as in pensamentu.

No ap’a sa campagna passione

e lassa, babbu meu, su lamentu:

como chi so fetende allenamentu

in-d-una bella iscuadra ’e pallone

si fizu tou ’essit che a Zola

at a parrer Oliena Siniscola.

 

49. Mura (47”)

Non chelzo a mi la fagher noiosa,

dogni malu propósitu distrue.

Antzis ti chelzo narrer una cosa

a da chi ses cantende frimu igue:

si a domo mi nd’’atis un’isposa

ses obbligadu a la campare tue.

A tie dadu apo su pane siguru

ma non devo pensare a issa puru.

 

50. Màsala (41”)

Goi o gai at a benner campada:

no sias malu, o babbu atrividu

ca tue puru un’innamorada

aias e diventadu ses maridu:

isculta a pena e addura fichidu,

che la finimos cun-d-un’abbratzada.

Chi potan esser dae custa die

totu sos fizos malos che a mie.

 

51. Mura (49”)

Cun custa fata est sa conclusione

ca cheret s’argumentu terminadu.

Beru ch’as fizu meu indovinadu

ch’aio a sa cumpagna afetzione

ma cando mi so deo cojuadu

tenia fata sa positzione

e ja chi cheres abbarrare in paghe

tue che babbu tou ti la faghe.