Su sotziu pro sa festa ‘e Santu Giuanne de Alà (fedales 1974), chin s’ajudu de su Comunu de Alà (Assessoradu a sa cultura) e de sa Proloco de Alà, organizad unu cuncursu a premios pro operas iscrittas pro tenores.

 

1.      Ogettu de su bandhu

 

Operas a tema liberu, noas e mai essidad fen’a como, iscrittas in limba salda (cale si siad faeddhu), de usare comente testu pro cantos a tenore. S’ad a dare preferentzia – pro faghere sa lista de meritu – a sas operas chi punnan a sa menzus calidade de musica e poesia, in’ue b’ad usu de peraulas antigas saldas e pius pagu impitu de italianismos.

 

2.      Chie bi poded leare palte

 

Etzi grupos de cantu a tenore cunfromm’a su connottu saldu (boghe, mesa ‘oghe, contra e basciu, o che-pare, comente cuntratos, cuncoldos e tasgia), chi poden iscriere issos mantessi sa cantone, o la poden racumandhare a poetes e cantonalzos de sa ‘iddha issoro. A donzi manera, su chi lead palte a su bandhu est su tenore, e su premiu chi poded ‘inchere est su sou e no de chie iscried s’opera.

 

3.      Maneras de bi leare palte

 

Sas operas deven essere iscrittas chin programma ‘e computer, imprentadas in calta bianca (mannesa A4) in chimbe copias, iscriendhe subra su titulu ‘e s’opera e in basciu un’istivinzu (puru de pius de una peraula). No si deven inditare in peruna manera ne lumene e sambenadu de su poete, e ne su lumene de su tenore (nemmancu cale si siad atera iscritta chi iscobied su poete, su tenore o sa ‘iddha da in’ue ndh’enini). Sas chimbe copias deven essere missas in-d-una busta ‘e littera. In attera busta s’ad a ponnere sa “Calta Annanta 1” de custu bandhu, iscrittu a-bruscinu in donzi palte e chin s’istivinzu inditadu in sas chimbe copias de s’opera. Custa “Calta Annanta 1” ad a essere frimmada dae unu ingarrigadu de su tenore, chi b’ad a annanghere copia de una calta de reconnoschimentu balida (de ponner issa mantessi in sa segundha busta). Ambas duas sas bustas, bene serradas e chena peruna iscritta a fora, si deven ponnere intr’e un atera busta (puru a saccu) de imbiare intr’e sa die de congruida de su bandhu, chin racumandhada A/R a custu indiritzu: Premio Tenoriades, Comune di Alà dei Sardi, Via Roma 24, 07020 Alà dei Sardi (OT).

Sa giuria de istimadores de su logu ad a faghere una lista de meritu pro detzidere sos 10 tenores ammissos a sa serada finale (in Alà su 28 ‘e lampadas 2014, pro sa festa de Santu Giuanne). In custa serada, donzi tenore (sos cantadores deved essere bestidos in costumene de sa ‘iddha issoro o in belludu o atera ‘estimenta salda) ad a cantare duos branos: unu saludu lestru a sa zente (o a sa ‘iddha o a su santu, a preferentzia sua) e daboi sa cantone in cuncursu. A fine serada una giuria ad a detzidere sa lista de meritu e duncas su tenore ‘inchidore.

 

4.      Congruida de su bandhu

 

Sas operas deven essere imbiadas a s’indiritzu inditadu subra, dae su 10 ‘e abrile 2014 fen’a sas 5 ‘e sera de su 31 ‘e maju 2014 (faghed fide su trimbu postale). Coladas 5 dies dae s’iscadentzia de su 31 ‘e maju, s’ad a definire sa prima lista de meritu, boghendhe-che sas operas imbiadas intr’e s’iscadentzia ma arrividas in retaldu pro istrobbos postales. Si cossizad, pro cussu, de no si attragare meda pro imbiare su tottu.

 

 

5.      Accoldos

 

Imbiare s’opera e duncas leare palte a su cuncursu cumpoltad s’impignu de balciare a palcu in sa serada finale pro sa festa de Santu Giuanne. Duncas, intr’e 6 dies dae su 5 ‘e lampadas (die de reunione de sa prima giuria) an a essere muttidos sos tenores ammissos a sa finale in piatta.

Imbiendhe sas operas issoro, tenores e poetes cuntzedin su pelmissu a sos organizadores de poder usare operas, musicas, e mazines de s’innisciu, pro cale si siad impitu chena lucru, comente donu a sos entes organizadores e a sos iscolanos de Alà.

 

6.      Premios

 

Pro sos premios b’ad in tottu 4.000,00 euros, de cumpaltire in custa manera: 1’ in lista de meritu 1.100,00 euros, 2’ in lista de meritu 700,00 euros, 3’ in lista de meritu 500,00 euros, 4’ in lista de meritu 400,00 euros, 5’ in lista de meritu 300,00 euros, dae su ‘e 6 a su ‘e 10 s’an a dare 200,00 euros peromine. B’ad fintzamenta unu premiu de 300,00 euros pro sas menzus poesias in sa prima lista de meritu fatta pro detzidere sos tenores finalistas. Sos 300,00 euros s’an a cumpaltire de asie: 1° in lista de meritu 150,00 euros, 2° in lista de meritu 100,00 euros, 3° in lista de meritu 50,00 euros. Sa pagamenta de cust’ultimu premiu s’ad a fagher derettamente in annanta a su premiu ‘e su tenore. Chi daboi poded, a ischirriu sou, donare cust’annanta a su poete, segundhu accoldos issoro, chena impignu perunu a garrigu de sos organizadores.

 

 

7.      Cuntatos e pregontas

 

Pro cale si siad pregonta si poded muttire s’ideadore de s’innisciu, s’ingarrigadu ‘e sa proloco Roberto Mette, in oras de offisciu a su numeru 0789 1964113, o sa email siendhas@tiscali.it, o pro fax a su numeru 178 6092742. Copia de custu bandhu si poded accattare finas in su situ internet de su Comunu de Alà, ass’indiritzu www.comune.aladeisardi.ot.it.