Su tenore Remunnu ’e Locu de Vitzi at pérdidu su solista chi l’at ghiadu pro barant’annos e pius. Piero Sanna est mortu in sas ùltimas dies de Bennarzu sende in s’edade de 72 annos, neghe de unu male chi non tenet remédiu pro chi sa chirca de sa siéntzia siat gherrende dae tempus meda in boza de l’agatare.

 

Sa preséntzia de Piero in s’istória de su càntigu sardu a tenore, umpare a totucantos sos cumpanzos suos in s’arcu de bator deghinas de annos (Tanielle Cossellu, Batore Bandinu, Tancredi Tucone, Màriu Pira e Pier Luigi Giorno), est de importu maduru ca sa melodia sua e de su tenore vitzichesu non si podet cunfùndere e mancu assimizare a perun’àtera.

 

Pro bonasorte nostra e de sos benidores, nos restan deghinas de incisiones de calidade primarza de sas cantones insoro: documentu chi non si medit cun sa materialidade de su valore in su mercadu de su mundu. E nos restat in su coro un’àteru consolu illacanadu: s’amistade sìnchera de un’ómine de pagas peràulas, fidele a sos imparos virtudosos de sos antinados nostros e a s’istima a sa terra nadia.