An a esser dóighi, su nùmeru de sos apóstulos de Gesus Nazarenu, sos assessores de su presidente de sa Regione Frantziscu Pìgliaru. Sa diversidade inter sas duas cheddas est una ebbia: sa preséntzia de sas féminas -nde devet seberares ses, deghiles a su dovere- chi in mesu sos cumpanzos de su Redentore non figuraian. Ma a s’ala de sos mascios inoghe puru, a tempus de oe, b’est su perìgulu de Giudas Iscariote.
Paret chi su presidente nostru non si fidet in parténtzia de totucantos, comente fut cumbinadu a su fizu de Nostra Segnora: caligunu l’at signaladu sas bramas cuadas de Fenilchetonùria, unu de sos chi isperan de fàghere s’assessore. Custu Fenilchetonùria est unu brigajolu de professione: in calesiat logu apat postu sos calcanzos at semper brigadu cun sos ghiadores de sos partidos (no est unu solu, sun nessi tres o bator, ca Fenil de partidos nd’at giambadu paritzos). Semper, in totu sas ocajones chi at tentu, sa briga nd’est bessida a campu.
Ma Frantziscu, fizu de Antoni, no est de répula brigajola. Intro sa Giunta non cheret brigas, Deus nos amparet dae sa discuncórdia. Et in terra pax hominibus bonae voluntatis. Amen.
