Urtima dì de trabbagliu e matessi urtima dì in sa cali su Casteddu est in sa Baddi de Aosta po aprontai su campionau de ocannu chi benit chi at a partiri a pustis de mesaustu. A mengianu no ant trabbagliau Luperto cun Viola, in prus de Pereiro chi sighit a ddu fairi a una parti. Veroli cun Lapadula, a su cumentzu, ant trabbagliau, su matessi, de una parti e dapoi funt torraus cun s’orrestu de sa truma po cantu pertocat sa manera de si ponni in campu. s’allenadori Davidi Nicola at fatu provai a is piciocus tirus de foras de area e insegus schemas po punitzionis e tirus de su corrunconi. A pustis su prangiu in s’Hotel Billia, sa scuadra est movia po Modena, po giogai intru de amigus cun sa scuadra allenada de Bisoli, a innantis de torrai in Sardigna.
Sa partida de su mericeddu est acabbada po 2-2 e su Casteddu, comenti de sempiri, ddu at sarvau Pavoletti, chi cun dd’unu corpu de conca candu is noranta minutus funt giai stetius giumpaus at postu s’acabbu a sa cuntierra.
Meris de domu chi ant segnau po primus, a pustis sa mesoredda de giogu, cun dd’unu tiru in is orus de is seixi metrus de Gliozzi. Dapoi de dus minutus at paregiau inderetura Piccoli cun dd’unu corpu de conca. Sa parti de unu acabbat de aici po 1-1. In sa parti de dus su Modena at torrau a segnai cun dd’unu tiru de is undixi metrus de Palumbo e, duncas candu sa partida fut acabbendu, Pavoletti at torrau a ponni sa partida in is binarius giustus.
Is giogadoris postus in campu de Nicola a su cumentzu funt stetius: Scuffet in porta e dapoi Zappa, Wieteska, Obert, Zortea, Adopo, Marin, Deiola, Augello, Luvumbo e Piccoli. In sa parti de dus funt imbucaus a innantis Hatzidiakos, Prati, Makoumbou, Lapadula e Pavoletti e a pustis Veroli, Felici, Jankto, Azzi, Sherri e Kingstone.
Immoi si torrat in s’Isula e lunis chi benit, in sa Unipol Domus po sa prima partida uficiali in sa Copa Italia, a innantis de sa de unu in campionau cun sa Roma, sempiri in Casteddu.
Màuru Mura
Dominigu su cuatru de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.avvenire.it/agora/pagine/nicola-luomo-delle-sfide-impossibili
