E imoi? S’Italia ce dd’at fata, dominigu si giogat sa finali de is Europeus, contras de cussa chi ndi at a bessiri bincidora in sa partida de custu meri tra Inghilterra e Danimarca. Is piciocus de Mancini non si frimant e, a pustis, ci airi bogau s’Austria e su Belgiu, eriseru est tocau a sa Spagna de Luis Enrique. Partida tostada cussa cun is spagnolus chi est acabada feti cun is tirus de is undixi metrus. A innnanti de decidiri chini si giogaiat sa finali is asulus ant sunfriiu contras de una scuadra forti a beru. Unu gol a cadunu, Chiesa po s’Italia e Morata po sa Spagna, in is centubinti minutus de sa partida, e da segus c’at pensau Donnaruma parendu su rigore de su centravanti de sa Juventus. Allirghia manna de totus, mascamente giogadoris, allenadoris e tifosus, ca una vitoria in custa manifestada mancat de tempus meda. Difatis feti in su 1968 is italianus ant bintu is Europeus, giogaiant Riva, Domenghini, Ferrini, Anastasi, Facchetti e atrus giogadoris famaus chi funt a tesu meda in su tempus. Imoi si podit torrai a bisai ca sa scuadra de Roberto Mancini tenit totu is numurus po allirgai su coru de is tifosus. Est una Natzionali chi pragit a totus e a pensai de aunia erribat est unu spantu: feti dus annus fait iat tocau unu de is puntus prus bascius de sa storia de su fubal non gioghendu is Mondialis. Mancini at fatu unu trabagliu de spantu, funt in pagus cussus chi ci creiant, ca is giogadoris non pariant aici fortis!
A pustis de sa partida s’allenadori italianu at chistionau: “Partida tostada cussa de oi. Sa Spagna est una scuadra forti meda e giogat beni. Nosu eus fatu una partida bella, non comenti atras, ma ddu sciaus ca depiaus sunfriri. Is piciocus funt cussus chi minescint de prus, ma ancora no est acabau nudda. Imoi depeus pensai feti a binciri sa finali”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://gianlucadimarzio.com/it/italia-mancini-intervista-repubblica-ceca-europei-4-giugno-2021
