Nasciu in Pontecorvo, su 24 de gennargiu de su 1952, in sa provincia de Frosinone, Roberto Quagliozzi at cumentzau a giogai a fubal cun is giovunus de s’Almas Roma, aunia at fatu in tempus a erribai in sa prima scuadra, in Serie D, in su campionau de su 1969-70. In cuss’annu at giogau trexi partidas segnendu finas dus gol. S’annu infatu, sempiri cun s’Almas, is presentzias in campu funt bessias a dixiotu e a pustis est bessiu de sa serie D a sa serie C po giogai cun su Rovereto. Non fut andada beni in Trentino e po custu, sempiri s’annu infatum, ndi fut torrau in Roma aunia giogaiat trinta partidas fendu cincu gol. Su Casteddu ddu comporat po su campionau de Serie A de su 1973-74. Giogat sa prima partida cun is sardus candu teniat bintidus annus, su 3 de friargiu de su 1974, cun su Napoli, partida perdia de su Casteddu po 1-0. In su primu campionau de Serie A bit su campu po cuindixi bortas. S’annu a pustis est unu de cussus chi teniant sa maglia sempiri segura e is presentzias bessit a bintitre. Ancora meglius andat de fatu po Quagliozzi, ma non po su Casteddu: difatis sa scuadra ce dd’acabat in Serie B, ma su giogadori de mesucampu giogat bintises partidas e po duas bortas segnat.
Quagliozzi abarrat in Serie B puru, ca intendiat sa maglia picigada a sa peddi e giogat tres campionaus, calendu in campu po norantacuatru bortas fendu finas noi gol. In su 1978-79 agiudat su Casteddu a torrai in Serie A e po cuatru campionaus giogat po atras norantas bortas cun atrus otu gol.
Est abarrau cun su Casteddu finas a su 1985 e at acabau sa carriera sua in su 1986 cun sa maglia de s’Ancona fendu cincu gol in binticuatru partidas.
In totu cun su Casteddu at giogau 297 partidas (154 in Serie A e 143 in Serie B) segnendu 10 gol in Serei A e doxi in Serie B.
A pustis chi at smitiu de giogai est abarrau a biviri in Casteddu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
