A pustis duas cidas de sa morti de sa pobidda, est mortu in Roma, bociu cussu puru de su Coronavirus su pobiddu, disterrau sardu. Sarbadori teniat setantaset’annus e nd’erribaiat de Siamanna. De annus meda biviat in Roma. S’agataiat in sa terapia intensiva de un’ispidali de sa Capitali italiana de is primas dis de arbili. Su disterrau e sa pobidda, de setant’annus, iant intendiu is primus signalis de su virus a incumentzu de custu mesi, paris a unu de is figlius chi biviat cun cussus. Totus ce dd’ant acabada in tres ispidalis de Roma. Su figliu ce dd’at fata e, a pustis, una pariga de dis est torrau a domu. Sa mama, invecias, est morta, a dolumannu, su 14 de arbili. Eriseru custa nova mala de sa morti de su babbu. In Siamanna s’est scipiu a merì e at chistionau, a nomini de totu sa bidda, su sindigu Francu Velio Melas: “Una nova chi non ci boliat e ponit sa bidda in tristura manna. Furint genti trancuilla, bofius beni de totus. Beniant a bidda dogan annu po passai is ferias, teniant ancora sa domu in Siamanna. Nos ant a mancai”.
Foto: https://www.comune.siamanna.or.it/index.php/vivere/galleria/Paese
