Fueddus tostaus, cussus de su presidenti americanu, Donald Trump, a s’Oms. Po Trump su sociu mondiali de sa saludi at nau faulas legias po su coronavirus e po custu ci funt mortus meda. Sa curpa, po issu, est cussa de airi aministrau mali, e at nau ca is americanus donant a su sociu dinari meda de prus de cussu chi donat sa Cina e s’aspetaiat un’ogu prus atentu po is Stadus Unidus.

“Apu chistionau de totu is problemas chi ci funt cun s’Oms, seus fendu un’indagu. A parrer nostu s’Oms non s’est cumportada beni cun nosu aici comenti at fatu finas sa Wto”.

A dd’arrespundiri c’at pensau a innanti su Democratic National Committee: “In su metris chi su mundu est cichendu de binciri custa pesta maladita, Trump non bolit donai prus dinari a su sociu chi est incarrigada de totus a dda cumbatiri. Fait erriscai sa saludi de totus po cicai de scarrigai sa curpa de is cosas chi at fatu mali”. Is segus finas Antoni Guterres, segretariu de s’Onu at tentu eita nai: “No est custa s’ora de donai prus pagu dinari, imoi serbit feti unidadi po cicai de binciri custa cuntierra”.

 

 

Foto: https://www.tio.ch/dal-mondo/cronaca/1431826/trump-oms-epidemia-coronavirus-accusa-emergenza-usa