Funt partius eriseru, de Casteddu po Lamezia Terme, is baulus de is fradis Davidi e Massimiliano Mirabello, bocius in Parteolla in friargiu. Cun is regulas po cicai de binciri su Coronavirus, feti unu ddus podiat acumpangiai finas a s’aereportu. S’at pigau custu impignu s’abogau Giuannifrancu Piscitelli, de su sociu Penelope, chi at postu, in nomini de sa familia, un’orrosa orrubia a intru de dognunu de is baulus.
Su dinari chi abisongiaiat po c’interrai is dus fradis in domu insoru est stetiu arregortu gratzias a sa solidariedadi de sa genti e de sa familia. Genti meda de Dolianova at donau calencunu francu. Eriseru, in s’ispidali de Pauli, s’abogau Piscitelli at aspetau finas a candu ant serrau is baulus: “Non mi dd’apu intendia de lassai a sa sola is piciocus, apu fatu cussu chi boliat sa familia chi m’at pediu de ponni a intru de is baulus dus orrosarius de prata e una orrosa orrubia po arregodai cantu ddis ant bofiu beni. Imoi ant essi in pagi”.
Arregodaus c apo custu bocidorgiu funt incurpaus dus pastoris, chi s’agatant in presoni: Joselito Marras de 52 annus e su figliu Michael de 27. Funt a intru de duas cidas e su babu at giai amitiu is curpas suas cichendu de ndi tirai a foras su figliu.
Foto: http://sangregoriodippona.asmenet.it/
