“Tocat a umperai s’Esercitu paris a carabineris e politzia po cicai de fairi arrespetai is regulas de su decretu ministeriali, partendu de is cursigeddas e de is passilladeddas in libertadi”. Est cussu chi at pediu su guvernadori de sa Lombardia Atiliu Fontana po cicai de binciri sa guerra cun su Coronavirus.
Fontana at chistionau, po telefunu, cun su presidenti de su Guvernu Conte e at pediu de ponni regulas ancora prus frimas. Castiendu is urtimus numurus, in Lombardia is positivus a su virus funt erribaus a 19884, 2171 in prus de sa dì innanti. Est unu numuru chi fait arriolai meda.
Non feti is sordaus bolit Fontana ma at chistionau puru de fairi serrai is uficius pubricus e is studius professionalis, e ancora de frimai is cantieris.
“Cun su presidenti de su Guvernu eus chistionau de sa situatzioni sempiri peus chi seus bivendu in Lombardia”.
De cussu chi s’est scipiu is sordaus ant calai in is stradas non feti de sa Lombardia ma finas in Campania e in Sicilia.
Foto: https://www.balarm.it/news/troppa-gente-a-spasso-in-sicilia-arriva-l-esercito-per-aumentare-i-controlli-nelle-citta-117559
