Po su lunis de Pasca Manna , in Sardigna, ant abarrai abbasciadas is serrandas de totu is butegas e oberint feti is potecarias e is parapotecarias. Ddu at nau su governadori de s’Isula Christian Solinas chi eriseru at postu sa firma sua in d’una oridinantzia regionali. Duncas su 13 de arbili, comenti giai sa dì de Pasca, abarrant serradas totu is atras butegas. A favori de totu custas mesuras funt finas is sindacaus. Su segretariu de sa Uil Tucs Cristianu Ardau at inderetura fatu sciri sa sua: “Sa delibera regionali, numuru 18 de su Presidenti Solinas, aunia narat de tenni serradas is butegas po su Lunis de Pasca, est unu bisongiu mannu po sighiri sa politiga sanitaria e po nosi difendiri de su Coronavirus”.
“No est custa s’ora po torrai a fueddai chi est giustu a trabagliai in is dis de festa ma una cosa est segura: chini trabagliat in su cumerciu mannu lunis s’at a podiri gosai una dì in prus po si pasai e abarrai in familia”, at acabau Ardau.
Foto: http://www.policentro.it/la-corte-del-sole/
