Is giogadoris de su Casteddu non pigant dinari po su mesi de arbili, aici si funt postus de acordiu cun sa sociedadi. Ddu at fatu sciri su Casteddu e totu cun d’unu documentu. S’acordiu est pragiu meda a su presidenti Giulini chi at scritu: “Torru gratzias a is giogadoris po sa sensibilidadi chi ant fatu biri de bolliri agiudai su Casteddu in d’unu tempus dificili meda, chi ancora, a dolumannu, no est acabau”.
Custu mengianu totu is giogadoris, is allenadoris e calencunu giogadori de sa Primavera puru ant fatu su tamponi e is esamis sierologicus in Asseminello. Cuasi una visita de is dotoris comenti cussas chi si faint a innanti de partiri po s’allenai in s’istadi. Ant incumentzau a is 10,30 de mengianu e is primus a erribai funt stetius Ceppitelli, Nainggolan, Ionita, Pisacane, Joao Pedro, Cigarini. A innanti de intrai a dognunu ant mesurau sa caglientura.
Foto: https://www.youtube.com/watch?v=0S2ZPVjvReI
