De tres dis in Sardigna non si contant mortus po su Coronavirus, est custa sa bella nova de eriseru. Po imoi, duncas, funt sempiri otantases cussus chi non ce dd’ant fata. Is impesstaus, po cussu chi narat sa Protetzioni Civili, funt 1.228 e is sanaus 288. S’agatant in 115 in is ispidalis e de custus, bintunu, funt in terapia intensiva. Is atrus 718 funt incungiaus in domu, atesu de totus. Is tamponis fatus funt erribaus a 15.328. Is impestaus de su virus funt aici dividius in Sardigna: 218 in sa zona de sa citadi metropolitana de Casteddu, 86 in su Sud Sardegna, 52 in Aristanis, 74 in Nugoro e 798 in Tatari. De su 14 de martzu is forestalis ant frimau 32.441 personis, feti 590 in sa dì de dominigu passau: 132 in Casteddu e provincia, 31 in Igresias, 53 in Aristanis, 206 in Tatari, 59 in Tempio, 70 in Nugoro e 39 in Lanusei. Bintises funt stetius cussus multaus: dexi in Casteddu, ses in Aristanis, cuatru in Iglesias, cuatru in Tatari e dus in Tempio.
Foto: https://www.comune.sini.oristano.it/it/
