Duxentus sessantadus tamponis fatus, tres positivus, manc’unu mortu e cincu sanaus. In totu imoi is malaidus funt bessius a 1.283 e aici funt dividius: 232 in sa citadi metropolitana de Casteddu, 92 in su Sud Sardegna, 54 in Aristanis e provincia, 76 in Nugoro e provincia e 829 in Tatari e provincia. Cussus chi s’agatant in is aposentus de is ispidalis calant a 116 e de custus in 19 funt in terapia intensiva; 660 is acorraus in domu a tesu de totus. Cussus sanaus funt in totu 322 e is mortus abarrant 109.
Funt custus is numurus, chi faint biri unu pagu de lugi, de su Coronavirus de eriseru in Sardigna.
Is tres impestaus nous funt in Casteddu, in d’una bidda de su Sud Sardegna e in Tatari. Su impestu s’est pigau massimamenti in is ispidalis e in is ospitzius.
Is mesuras noas de su Guvernu non funt pragias a totus, candu eus torrai a biri sa lugi in s’Isula nosta. Po imoi pensaus de nci bogai su virus comenti ci eus bogau is piemontesus, ca oi sa Sardigna est in festa arregodendu cussu chi est sussediu su 28 de arbili de su 1794.
Foto: http://www.geatracks.it/it/372/murales/francesco-del-casino/omaggio-giovanni-maria-angioy
