A pustis chi in Sardigna, po tres dis de sighiu, is mortus, po su Coronavirus, funt frimus a otantasesi de eriseru si ndi contant seti in prus. Erribaus aici a norantatres. De candu est intrau in s’Isula su Covid-19 at impestau 1.236 personis chi imoi s’agatant in is ispidalis (112), in terapia intensiva (21) e acorraus in domu (704). Po cussu chi narat s’Unidadi de crisi regionali is tamponis fatus funt 15.886.
Sighint a bessiri is sanaus, de eriseru si ndi contant cuindigi in prus e imoi funt 257. Is positivus a su Coronavirus funt aici dividius in Sardigna: duxentubintises in Casteddu e in sa citadi metropolitana, otantases in sa provincia de su Sud Sardegna, cincuantadus in sa provincia de Aristanis, setantacuatru in cussa de Nugoro e setigentunorantotu in Tatari e provincia.
In s’ora su sindigu de Casteddu, Pàulu Truzzu, si narat cunvintu de torrai a oberri totu, ma a ddu fairi in seguresa: “Depeus tenni is mascherinas e is guantus ma prus che a totu su Guvernu depit essiri garanti de totu s’orrestu”.