In sa prima die de sa “Fase 2” s’abasciant galu is casus nous de Coronavirus in Italia. Funt, difatis, 1221 is impestaus de is urtimas binticuatr’oras, contras is 1397 de sa die a innanti. Sighit a s’abasciai finas cussus chi furint in is ispidalis: 419 ndi funt bessius de is aposentus e 22 de sa terapia intensiva. Su numuru de is chi ndi funt bessius e sanaus imoi bessit a 82.879. Is mortus de eriseru funt “feti” 195, numuru custu chi fait giumpai is 29mila. In totu, de sa segunda metadi de friargiu, eus tentu 211.938 impestaus e 2.191.403 tamponis fatus. Custus funt is numurus chi at donau, comenti dogna die, sa Protetzioni Civili natzionali.
Is malaidus funt aici spainaus in Italia: 37.307 in Lombardia, 15.562 in Piemonti, 8.984 in Emilia-Romagna, 7.234 in Veneto, 5.279 in Toscana, 3.508 in Liguria, 4.385 in su Latzio, 3.206 in is Marche, 2.711 in Campania, 1.165 in sa provincia de Trento, 2.945 in Puglia, 2.202 in Sicilia, 1.050 in Friuli Venetzia Giulia, 1.837 in Abruzzo, 636 in sa provincia de Bolzano, 181 in Umbria, 653 in Sardigna, 110 in Valle d’Aosta, 674 in Calabria, 173 in Basilicata e 178 in Molise.
Foto: https://www.giornalettismo.com/numeri-coronavirus-4-maggio/
