Eriseru po chistionai, comenti de dogna dì, de is numurus de su Coronavirus s’est setziu cun is giorronalistas su comissariu po s’emergentzia Dominigu Arcuri. Mancaiat galu Angilu Borrelli e Arcuri ddu at bofiu saludai inderetura: “Ddu isetaus coidendu”.
“Is sanaus in is urtimas binticuatr’oras funt crescius in numuru de 589 e imoi funt in totu 10.950. Is mortus, invecias, funt 969, finas chi cincuanta funt de contai in sa dì a innanti ca eus faddiu unu contu. Imoi in totu eus giumpau is noimila e seus a 9.134 mortus”. Su numuru de is positivus est 66.414, de custus 3732 s’agatant in terapia intensiva. “Ndi eus portau setantacincu de sa Lombardia in atras regionis chi tenint prus logu e podint agiudai is ispidalis”.
“Is numurus de s’Italia, ma finas cussus de is atras natzionis nosi narant cantu est manna e cantu est erribada a totus custa pesta chi non si fut bida mai in perunu logu. Nosi fait prageri bidi ca in totue umperant is regulas chi eus postu in campu giai de unu pagu de tempus in Italia”.
Arcuri chistionat puru de una nova importanti po coidai in sa spartidura de is materialis sanitarius: “De cras, torrendu gratzias a su ministeru de sa Difesa, eus a umperai non feti is camion ma finas is elicoterus”.
Foto: https://www.giornalettismo.com/numeri-coronavirus-27-marzo/
