Che sempiri sa Protetzioni civili, eriseru a is ses de merì, at donau is numurus de mortus, impestaus e sanaus de su Coronavirus. Angilu Borrelli, su capu, at incumentzau chistionendu inderetura de sa genti chi est sanada: 408. Andant a s’aciungiri a is atrus e faint bessiri is sanaus a 7423 in totu. Is positivus, eriseru funt 3780 in prus, crescius a 50.418, de custus 26.522 abarrant serraus in domu e 3.204 in terapia intensiva. Is mortus 601 e giumpant is ses mila in totu (6.077 po precisioni).
In cuatru, de sa Lombardia, ddus ant trasferius in atrus ispidalis foras de sa regioni. In totu funt 68 cussus bessius, de custus 28 positivus e 40 no. Sa Germania, at arregodau Borrelli, nd’at pigau is primus dus chi funt partius giai e nd’iat depiri pigai otu in totu: “Custu nosi fait cumprendiri s’importantzia manna de sa solidariedadi internatzionali”.
Foto: https://telenord.it/coronavirus-i-numeri-3957-malati-e-651-i-decessi-nelle-ultime-24-ore
