In pissu de 400 tamponis fatus feti tres funt arresurtaus positivus. Funt is numurus prus bellus de unu mesi a imoi cussus donaus de sa Regioni po sa pesta de su Coronavirus. A dolumannu tocat a contai finas dus mortus in prus ma is impestaus parit ca in Sardigna siant sempiri de mancu: in cust’ora funt 865 is positivus (1.164 in totu, contenduru mortus e sanaus). In terapia intensiva s’agatant feti in binticuatru, totu s’orrestu est in domu.

Numurus chi agiudant a biri sa lugi, finas chi, comenti ant arregodau is autoridadis regionalis, non est ancora erribada s’ora de non sighiri is mesuras. Difatis, po is espertus, tocat a castiai cussu chi sucedit in d’una pariga de dìs e non solu in d’una. A dogna manera, giai s’incumentzat a castiai – comenti est giustu – a su benidori. A torrai a oberri is butegas, a s’istadi e a sa festa de Sant’Efis.

Su disigliu prus mannu est cussu de podiri nai, coidendu, chi sa Sardigna nd’est bessida de custa pesta maladita e chi siat – po cussu chi narat calencunu – sa prima regioni italiana libertada de su Covid.

 

 

Foto: https://comune.gergei.ca.it/notizie/155855/aggiornamenti-covid-19-autosegnalazione-ingresso