Nova legia po sa Sardigna: de eriseru ci funt atrus apestaus de Coronavirus. Unu, comenti fait sciri sa Regioni, est in Tatari e un’atru in Nugoro. Bessint imoi a trintotu cussus chi nd’ant boddiu su virus. De nai puru ca atrus chi iant fatu su tamponi funt arresurtaus sanus.
In su mentris chi totu s’Italia s’incungiat in domu, s’assessori a sa Sanidadi sarda Màriu Nieddu at donau dispositzionis po calencuna patologia: “Is diabeticus o cussus chi sunfrint de coru non depint andai de su dotori po arretzetas noas ma totu ant essi fatu in automaticu, sarvu chi su dotori non dda pensit in atra manera”.
Po cicai de non fairi preniri is aposentus de is dotoris de mannus e pipius sa regioni at nau aunia est possibili de mandai is arretzetas cun sa posta eletroniga o po telefunu. “Funt mesuras importantis chi abisongiant a totus po cicai de non fairi bessiri sa genti de domu”, at nau sempiri s’assessori.
Foto: https://www.cronachenuoresi.it/2020/01/22/regione-sardegna-negato-lingresso-ad-una-famiglia-non-vestita-correttamente-secondo-il-regolamento-e-polemica/
