“Est impossibili in Sardigna feti a pensai de podiri fairi, in su tretu in s’oru de su mari, is box in plexiglas”. Custus is fueddus de Claudiu del Giudice, presidenti de su Sib, su sociu de cussus chi trabagliant in is spiagias de sa Sardigna, chi scrocorigat su pensamentu po podiri sarvai sa stagioni turistica chi est erribendu. “Cun su bentu chi teneus in Sardigna – sighit a nai – est de macus feti a ddu pensai, est finas perigulosu meda po sa genti. Abisongiat a pensai a mesuras po totus”.
Sa dificoltadi prus manna est ca is spiagias de s’Isula non funt totus ogualis: “Unu contu est su Poetto, un’atru est cussu chi podeus agatai in Gaddura. Tocat a si setziri in-d’una mesa cus is assessoris e incumentzai a ragionai eita aberu si podit fairi. Tocat a si donai regulas, non bastant cussas de s’Oms”. De su sociu at a partiri finas una litara po su presidenti de sa Regioni Solinas aunia si pedit de donai su cumandu de podiri trabagliai in is spiagias po ponni totu in seguresa, poita imoi, cun s’urtima decretu regionali, nemus podit intai e ddue funt medas trabaglius ancora de fairi.
Sa solutzioni po Del Giudice est cussa de “fairi is tamponis a totu is sardus, po garantiri a chini erribat a passai is ferias ca sa Sardigna est una regioni ‘free virus’”.
Foto: https://www.fcinter1908.it/video/video-spiaggia-plexiglass/
