Est incumentzau, po sa setantesima borta, su Festival de sa cantzoni in Sanremo. Eriseru fut sa segunda puntada e sa genti, a pusti sa prima, at sighiu a ddu castiai. Est a pensai ca ddu at bidu su 53,3% de cussus chi funt castiendu sa televisioni e ca po tenni numurus aici artus, po su Festival, tocat a torrai a coa fintzas a su 1995 candu presentaiat Pippo Baudo.
Sa prima parti de su merì de eriseru dd’ant sighia in 12.841.000 e sa segunda invecias in 5.451.000 chi però baliat su 56,1% de share. S’annu passau, candu presentaiat Claudiu Baglioni, su segundu merì fut bagliu su 47,3% de share. Funt numurus chi pragint a is ominis de sa Rai.
Grandu sucessu ant tentu is Ricchi e Poveri chi nd’ant fatu pesai totu sa genti chi fut in s’Ariston candu ant incumentzau a cantai is cantzonis storicas comenti “Che sarà”, “Sarà perchè ti amo” e “Mamma Maria”.
Spassiu mannu, su matessi, candu est erribau su tennista prus forti de su mundu, Novak Djokovic, chi at “giogau” cun Fiorello a tennis e, in segus, at cantau Terra Promessa de Eros Ramazzotti. Atras cosas de arregodai de su merì de eriseru funt s’arregordu de totu su tiatru po Fabrizio Frizzi, chi eriseru iat airi fatu is annus, e is fueddus de Pàulu Palumbo, su piciocu malaidu de SLA.
Foto: https://www.altrospettacolo.it/sanremo-2020-cantanti-canzoni/
