Funt bessius a 4.825 is mortus de su Coronavirus in Italia, feti eriseru 793. Est su numuru prus artu de mortus de candu su virus est erribau in Italia, e dogna dì funt crescendu de prus. Candu at a incumentzai a s’abasciai? Ancora non si scit e nemus cicat de ddu nai cun fortza. Po imoi cussus sanaus funt prus de is mortus, 6.072, 943 prus de s’atra dì. Is malaidus in totu funt 42.681, 4.281 in prus in d’una dì. Cun mortus e sanaus teneus in totu 53.578 impestaus. 2857 is malaidus in terapia intensiva, 202 in prus de sadì prima. De custus, est a nai, ca 1093 funt feti in Lombardia. Numurus chi faint a timiri!

Borrelli, su capu de sa Protetzioni Civili, eriseru at fueddau comenti fait dogna mericeddu: “Seus pighendu mascherinas chi podint essiri umperadas in atrus modus. Seus comporendu cussas po dotoris e infermieris e atras de donai in Lombardia. In is dis chi benint ant a erribai cincuantadus dotoris cubanus po s’ispidali de campu chi s’agatat in Cremona”.

 

 

Foto: https://www.cdc.gov/coronavirus/2019-ncov/cases-updates/summary.html