Massimu Cellino, presidenti oi de su Bresciu e in is annus passaus de su Casteddu po tempus meda, est positivu a su Coronavirus. “Soi in Casteddu de una pariga de dis, a pustis airi fatu tres cidas incungiau in Brescia. In segus, po passai sa Pasca Manna cun sa familia mia, apu afitau un’aereu e soi torrau. A pustis atras duas cidas de acorramentu in Casteddu, soi andau a fairi calencunu controllu in s’ispidali. Nd’est bessiu a foras chi figlia mia at passau su virus, figliu miu invecias nou. E deu ddu tengiu imoi. Signalis? Stanchesa e doloris fortis a is ossus e a su figau. Ma, forsis, custu est po su fubal, est de macus a chistionai ancora chi si possat giogai”, custus is fueddus de Cellino in d’una intervista cun Repubblica.
“Non intendu peruna sensibilidadi e mancu s’arrespetu po mi pediri de torrai a incumentzai su campionau foras de sa Lombardia. Non timu a nci calai un’atra borta in Serie B, finas poita torraus a bessiri inderetura, teneus giogadoris fortis e giovunus e is contus torrant”. Po su presidenti beciu de su Casteddu, po torrai a partiri “tocat a fairi is tamponis a totus e mancunu depit essiri positivu. Chi non oberint is cresias comenti si fiat a fairi partiri su campionau? Chi biu calencunu erriscu sa scuadra mia non dda facu giogai. Pedu responsabilidadi a is presidentis de sa Figc e de su Coni”.
Foto: https://www.pianetamilan.it/news-milan/interviste/calciomercato-cellino-tonali-decida-con-il-cuore-milan-non-so-di-chi-sia-il-club/
