Funt feti dus articulus cussus de su decretu ministeriali nou de su Presidenti de su Guvernu chi allonghiat a totu s’Italia is mesuras giai pigadas po is regionis de su Nord. Su documentu, chi balit de oi finas a su tres de arbili narat de non si moviri de domu chi non po apretu mannu, serrat is bar e is ristorantis de is ses de merì e frimat calechisiat tzerimonia civili o religiosa puru.
Ci funt duas novas importantis: “In totu Italia – narat su decretu – non si podit essiri in medas in is logus pubricus o obertus a su pubricu” e insegus “Funt suspendius totu is manifestatzionis sportivas de dogna cosa, in logus pubricus o privaus”.
“Non c’at essi feti una zona orrubia, ma at essi totu s’Italia aici”, at nau Conte eriseru a merì. “Serbint mesuras chi cunvinciant de prus, de pissu a basciu de s’Italia po binciri custa guerra cun su Coronavirus” at sighiu su presidenti. Conte at finas e nau: “Scieus beni ca est dificili meda a cambiai su modu de biviri de dognunu, ma non teneus prus tempus: est crescendu su numuru de sa genti impestada e de is mortus, duncas depeus fairi calencuna cosa de prus po su beni de sa Natzioni nosta, e aici eus fatu”.
Foto:http://www.ansa.it/sito/notizie/politica/2020/03/09/coronavirus-conte-seguiamo-le-regole-e-litalia-si-alzera_bc205cb3-b0d9-4540-b68c-a5ad869d010b.html
