Mesuras ancora prus fortis po totu s’Italia po sonumancu atras duas cidas. Su presidenti de su Guvernu Conte at pigau po bonas is disiglius de sa regioni Lombardia e imoi balint po totu s’Italia. Conte ddu at nau in d’una direta in Facebook, a pustis airi postu su nomini sou in su tertzu decretu in d’una cida: bar, ristorantis, butegas de bestiris, butegas po is pilus, mensas, anta barrai serraus po totu sa dì. Si podit fairi portai sa spesa in domu. Serrant finas totu is mercaus.
Funt medas, su matessi, cussus chi si podint nai butegas de abisongiu chi podint abarrai obertas: butegas de cosa de papai, potecarias, stangus e edicolas. Ma finas idraulicus, mecanicus, benzinajus, artigianus, butegas chi bendint articulus po animalis. Totu is garantzias puru poi s trasportus e is servitzius de utilidadi po totus chi depint, a dogna manera comenti fut giai de prima, abarrai sa genti a distantzia de unu metru. Ant a funtzionai finas is bancas, postas, finantziarias, asseguratzionis.
In pagus fueddus Conte at bofiu serrai totu cussus logus aunia sa genti abarrat totu paris e cussas atividadis aunia est dificili a abarrai a unu metru s’unu cun s’atru.
“Non c’est abisongiu de curriri po comporai sa cosa de papai, is butegas abarrant obertas e is provistas ci funt po totus”, at aciuntu su presidenti.
Foto: https://www.adnkronos.com/fatti/politica/2020/03/08/coronavirus-conte-ecco-decreto-definitivo_Po8bHRZZy5c0ISc9nv9CFO.html
