In Sardigna ancora non si fut mortu nemus de is dotoris de familia. De eriseru mancu custu podeus narri ca s’est mortu su dotori Nabeel Khair, teniat sessantadus annus. De is urtimas dìs de friargiu iat pigau servitziu in Tonara ma po annus medas iat trabagliau, comenti de guardia medica, in Aritzo.
“S’agataiat in s’ispidali de Is Mirrionis de is primas dis de martzu, ma custa nova nos at lassau aberu chena fueddus, non creiaus chi fut aici postu mali”, at nau sa sindaga de sa bidda de Peppino Mereu, Flavia Loche.
“Su dotori fut erribau in Tonara de pagu, a sa fini de una cuntierra portada a innanti de sa bidda a pustis chi unu de is dus dotoris chi teniaus si nd’est andau in pensioni. Po custu, prus o mancu, in cuatrucentu funt chena dotori”, arregodat sa sindaga, “medas non ant acodiu mancu a ddu connosciri”.
Khair, palestinesu, rapresentaiat sa comunidadi sua in Europa e biviat de annus medas in Sardigna, aunia est stetiu unu de is primus dotoris a essiri impestau de su Coronavirus.
De pagu ddi fut morta una figlia e a ddu prangiri imoi funt sa pobidda Rita e atras duas figlias. In medas, in Facebook massimamenti, ddu funt arregodendu: sa comunidadi palestinesa, s’Anpi e atra genti meda chi ddu ant connotu.
Foto:https://www.videolina.it/articolo/tg/2020/04/08/coronavirus_la_morte_di_nabeel_khair_per_tanti_anni_medico_ad_ari-78-1006485.html
