Lunis chi ‘enit su consigliu comunali de S’Alighera at a votai is deliberas po donai sa citadinanza onoraria po Gigi Riva, chi cun su Casteddu at bintu su scudetu in su 1970, Meo Sacchetti, allenadori de sa Dinamo Tatari chi at bintu scudetu, duas copas Italia e una Supercoppa, e Osvaldo Bevilacqua, chi fait “Sereno Variabile” in sa televisioni. Ma poita a-i custus tres? Si ligint in su giassu de su Cumunu custus fueddus:

Gigi Riva: “Sportivu, omini e simbulu de su fubal in Sardigna e in Italia. Esempiu mannu po totus in su sport e po sa terra chi dd’at fatu diventai sardu. Medas bortas at chistionau po difendiri sa Sardigna e su populu sardu”.

Romeo Sacchetti: “Grandu sportivu e omini de totu su basket italianu, allenadori po medas annus de sa Dinamo Sassari chi at portau a binciri meda. Imoi est allenadori de sa Natzionali italiana e at scioberau S’Alighera po biviri, fendu connosciri sa citadi nosta dogna borta chi chistionat”.

Osvaldo Bevilacqua: “In prus de corant’annus de carriera in televisioni in sa Rai at  chistionau de sa storia e de sa cultura de S’Alighera cun sa trasmissioni chi at sempiri fatu: Sereno variabile”.

 

 

Foto: calabriansmostfamous.com